ՀԱՅԱՍՏԱՆԻ ԱԶԳԱՅԻՆ ԺՈՂՈՎԻՆ ՄԷՋ ԿԱՌԱՎԱՐՈՒԹԵԱՆ ՀԱՐՑԱՊՆԴՈՒՄԸ ՄԵՐԺՈՒԵՑԱՒ

Երէկ Հայաստանի Ազգային ժողովին մէջ կառավարութիւնը հարցապնդելու ՀՅ Դաշնակցութեան առաջարկին դէմ քուէարկեցին 48 պատգամաւորներ, ձեռնպահ մնացին 4-ը, իսկ թեր` 13-ը:
Խորհրդարանի արտաքին յարաբերութիւններու մնայուն յանձնախումբի նախագահ, ՀՅԴ Հայաստանի Գերագոյն մարմնի ներկայացուցիչ Արմէն Ռուստամեան քուէարկութենէն ետք լրագրողներուն հետ զրոյցին ընթացքին յայտնեց, որ խորհրդարանի քուէարկութեամբ հարցը չի փակուիր:
ՀՅԴ-ի համոզումով, կառավարութիւնը տակաւին չէ գործադրած յուլիս 2008-ին իր իսկ կողմէ հաստատուած «Հայաստանի կառավարութեան 2008-2012 թուականներու գործունէութեան նախաձեռնութիւններու ծրագիր»ը եւ հետեւաբար գերազանցած է սահմանադրութեամբ իրեն վերապահուած լիազօրութիւնները, որովհետեւ ծրագիրը կա՛մ պէտք է գործադրուէր, կա՛մ զայն պէտք էր փոխեր Ազգային ժողովը: Սակայն ո՛չ մէկը, ո՛չ միւսը տեղի ունեցած է: Ուստի, ՀՅԴ պիտի ձգտի հաւաքել Ազգային ժողովի առնուազն 27 պատգամաւորներու ստորագրութիւն, որպէսզի հարցը քննէ Սահմանադրական դատարանը:
Հայաստանի խորհրդարանական ընդդիմութեան կուսակցութիւնները` ՀՅԴ-ն եւ Ժառանգութիւնը, համապատասխանաբար ունին 16 եւ 7 պատգամաւորներ:
Անհրաժեշտ է եւս 4 պատգամաւորներու ստորագրութիւնը: Ռուստամեան նշեց, որ իրենք պիտի դիմեն իշխող քաղաքական համաձայնական կառավարութեան մաս կազմող կուսակցութիւններուն, որպէսզի անոնց պատգամաւորներէն միանան Սահմանադրական դատարան ուղղուած Դաշնակցութեան դիմումին: Յայտնենք, որ Հայաստանի Ազգային ժողովի անցնող քառօրեայ նիստին ընթացքին կատարուեցաւ նաեւ խորհրդարանի նախագահի եւ փոխնախագահի ընտրութիւն:
Ազգային ժողովի նախագահ ընտրուեցաւ Սամուէլ Նիկոյեան, իսկ փոխնախագահ` Էդուարդ Շարմազանով: