ՀԱՐՑԱԶՐՈՅՑ «ՎԻՎԱՍԵԼ»-Ի ՏՆՕՐԷՆ ՌԱԼՖ ԵԻՐԻԿԵԱՆԻՆ ՀԵՏ
ՐԱՖՖԻ ՏՈՒՏԱԳԼԵԱՆ.- Սփիւռքի երիտասարդութիւնը ինչպէ՞ս ընդունեց ձեզ, ի՞նչ էր իրենց ակնկալութիւնը։
ՌԱԼՖ ԵԻՐԻԿԵԱՆ.- Ընդունելութիւնը ջերմ էր եւ ոգեւորող: Ի՞նչ էին ակնկալում հայ երիտասարդները՝ իրենք կարող են ասել: Կարեւոր էր այն, որ, հանդիպման ձեւաչափն անմիջական էր՝ մտորումներն ու տեսակէտները կիսելու տրամաբանութեամբ: Երիտասարդներից շատերի աչքերում շողացող փայլը փաստում էր՝ որ արտերկրում բնակուող նոր սերունդը ցանկանում է տեսնել առաւել հզօր հայրենիք եւ պատրաստակամ է իր աջակցութիւնն ունենալ այդ հարցում: Նրանց հարկաւոր է պարզապէս կատարել առաջին քայլը, որն սկսւում է հայրենիք այցելութիւնից, սեփական կարծիքը ձեւաւորելուց եւ երազանքն իրականութիւն դարձնելու պատրաստակամութիւնից:
Ձեր կարծիքով, ո՞րն է ձեր կազմակերպութեան յաջողութեան գաղտնիքը, մանաւանդ երբ սուր մրցակցութիւն կը դիմագրաւէք Հայաստանի մէջ։
Մեր յաջողութեան գաղտնիքը թափանցիկ աշխատելաոճն է եւ օրէնքի գերակայութեան նկատմամբ յարգանքը: Մենք երբեք չենք խուսափում հարկային պատասխանատուութիւնից: Աւելի՛ն. առաջին հարկ վճարողն ենք մեր երկրում: Այս ամէնին զուգահեռ՝ միշտ լաւատես ենք եւ վճռական՝ մեր բոլոր նախաձեռնութիւններում:
Ձեր կարծիքով, ի՞նչ պատկերացում ունին սփիւռքահայ գործարարներն ու մասնագէտները Հայաստանի պիզնըս միջավայրին մասին։ Արդարացուա՞ծ է այդ կարծիքը։
Իւրաքանչիւրն ունի կարծիք կազմելու իր իրաւունքը: Կարեւոր է սակայն, որ այդ կարծիքը ձեւաւորուի ոչ թէ մէկ ուրիշի խօսքին հետեւելու, յաջողուած կամ ձախողուած քայլերը հիմք ընդունելու, այլ՝ սեփական մտորումների արդիւնքում: Որեւէ իրավիճակի կամ երեւոյթի մասին լիարժէք պատկերացում կազմել հնարաւոր չէ, եթէ այն ձեւաւորւում է կողքի կարծիքի վրայ: Հայաստանի պիզնըս միջավայրի մասին սփիւռքի պատկերացումները մասամբ ձեւաւորուած են դրա վրայ: Կարծում եմ՝ դա արդարացուած մօտեցում չէ:
Ի՞նչ պէտք է ընել, Հայաստանի պիզնըս միջավայրին մասին ճիշդ եւ առարկայական կարծիք ստեղծելու համար սփիւռքահայութեան մէջ։
Մենք մեր օրինակով փաստում ենք, որ Հայաստանի պիզնըս միջավայրում կարելի է ոչ միայն յաջողուած գործունէութիւն ծաւալել, այլեւ՝ լինել առաջատար: Գաղտնիքը օրէնք յարգելն է, հարկային պատասխանատուութիւնից չխուսափելն ու յաջողելու վճռակամութեամբ գործելը: Ամբողջ աշխարհում դա է առաջընթաց ապահովող ռազմավարութիւնը:
Համալսարաններու եւ այլ վայրերու մէջ ձեր դասախօսութեանց ընթացքին դուք միշտ կը շեշտէք հետեւեալը. «Մենք ապրում ենք մեր ինքնութիւնը սիրելու համար եւ մեր սէրն արտայայտում ենք ծառայելով այդ ինքնութեանը»։ Իբրեւ գլխաւոր տնօրէն, ի՞նչ կը նշանակէ սա ձեր կազմակերպութեան համար եւ ոեւէ այլ գործարարի համար։
Դժուար է պատկերացնել, որ կայ մէկը, ով պատրաստ է իր ընտանիքում ապրել առանց ծնողների, հարազատների նկատմամբ սիրոյ: Միմեանց աջակցելու եւ ընդհանուր ջանքերով յաջողութիւն ունենալու պատրաստակամութիւնը «Վիվասել-ՄԹՍ»-ում դրսեւորւում է առաջին իսկ օրուանից: Այդպէս է ձեւաւորւում յաջողութեան այբուբենը:
Վերջին հարցում. ի՞նչ խորհուրդ կու տաք սփիւռքի երիտասարդ հայ մասնագէտներուն եւ գործարարներուն, ի՞նչ կրնան ընել Հայաստանի մէջ, կամ թէկուզ՝ Հայաստանէն դուրս, հայրենիքի տնտեսական զարգացման առումով։
Միացեալ Նահանգներ մեր այցելութեան ընթացքում մենք մեր հայրենակիցներին յորդորեցինք, որ հայրենիքի մասին չդատեն խօսակցութիւնների կամ լուրերի հիման վրայ: Մենք կոչ արեցինք, որ նրանք այցելեն հայրենիք, տեսնեն այդ հողի մարդկանց, համտեսեն հացը, խմեն ջուրը եւ նոր արդէն որոշեն՝ մնա՞լ, թէ՞ ոչ: Հայերը կարիք չունեն, որ ոեւէ մէկը նրանց հրաւիրի գալ Հայաստան. նրանց հիմնական խթանը ինքնութիւնն է: Պէտք չէ հարցնել, թէ ի՛նչ կը տայ քեզ հայրենիքը, այլ պէտք է հարցնել, թէ ի՛նչ կարող եմ տալ ես իմ հայրենիքին: Այդպիսով, ամէն ոք միջոց կը գտնի գոյատեւելու եւ բարեկեցութեան հասնելու համար՝ իր ընտանիքի եւ ժողովրդի հետ միասին: Գաղտնիքը, ինչպէս վերեւում արդէն նշեցինք, մեր երկրի օրէնքի տառը յարգելն է:
«« վերադարձ ««