Ուրբաթ օր, Ռուսիոյ Արտաքին Գործոց Ենթա-նախարար Ալէքսէյ Մէսքօֆ, իր Կիպրոս կատարելիք հանդիպումներուն ընթացքին պիտի զրուցէ կիպրական հարցի իրադարձութիւններուն, Կիպրոս-Ռուսիա երկ-կողմանի յարաբերութիւններուն, ինչպէս նաեւ՝ շրջանային եւ միջազգային հարցերու մասին։

Ինչպէս կը տեղեկանայ Cyprus News Agency-ն, պարոն Մէսքօֆ, որ Կիպրոս կը ժամանէ Հինգշաբթի օր, Ուրբաթ առաւօտ պիտի ընդունուի Հանրապետութեան նախագահ Նիկոս Անաստասիատիսի կողմէ, հանդիպում պիտի ունենայ արտգործ նախարար Իոաննիս Կասուլիտիսի հետ եւ խորհրդակցութիւններ պիտի ունենայ արտգործ նախարարութեան Ընդհանուր Տնօրէն Ալէքսանտրոս Զինոնի հետ։

Պաշտօնական աղբիւր մը յայտնեց Cyprus News Agency-ին, թէ պարոն Մէսքօֆ, Ռուսիոյ արտգործ նախարարութեան մէջ, պատասխանատու է Ռուսիոյ եւ Կիպրոսի միջեւ գոյութիւն ունեցող յարաբերութիւններուն եւ թէ իր այցելութիւնը կը կատարուի, գլխաւորաբար զրուցելու հարցերու մասին, որոնք կը վերաբերին երկու երկիրներուն միջեւ գոյութիւն ունեցող յարաբերութիւններուն։

Ան աւելցուց, թէ երկու երկիրներու արտգործ նախարարութիւններու պաշտօնակատարներ, քաղաքական խորհրդակցութիւններ կը կատարեն տարին երկու անգամ, այսինքն՝ մէկ անգամ Կիպրոս եւ մէկ անգամ՝ Ռուսիա։

«Այցելութեան գլխաւոր նպատակն է զրուցել երկու երկիրներու երկ-կողմանի յարաբերութիւններուն մասին, սակայն յստակ է, որ տեղի պիտի ունենայ նաեւ զրոյց, ներկայ կացութեան մասին, ինչ կը վերաբերի կիպրական հարցի լուծման գործընթացին», յայտնեց նոյն աղբիւրը։

Աւելցնել Ձեր մեկնաբանութիւնները