Յունաստանի արտգործ նախարար Նիկոս Կոծեաս կը մեղադրէ ՄԱԿ-ի Ընդհանուր Քարտուղարի Յատուկ Խորհրդական Էսփէն Պարթ Այտայի կեցուածքը, կիպրական հարցի լուծման համար թափուող ջանքերուն մէջ։

Ելոյթ ունենալով ազգային տօներու առթիւ կազմակերպուած ձեռնարկին, պարոն Կոծեաս յայտնեց, թէ իր վրայ տպաւորութիւն թողած է միջազգային բանագնացի վերաբերմունքը, որ ինքզինք հռչակած է իբրեւ իրաւարար, Թուրքիոյ եւ Եւրոպական Միութեան միջեւ։

Ան հարց տուաւ նաեւ, թէ խնդրոյ առարկայ բանագնացը որեւէ իրաւասութիւն ունի՞ որեւէ մէկէն, եւ թէ ինչպիսի՞ իրաւասութիւն է ան։

Անդրադառնալով բանակցութիւններու վերաբերեալ՝ Անգարայի կեցուածքին, պարոն Կոծեաս արտայայտեց ա՛յն համոզումը, թէ Թուրքիա ջանք կը թափէ անտեսել կղզիի գրաւման կնճռոտ հարցը եւ փորձ կը կատարէ ներկայացնելու իր քաղաքացիներու իրաւունքերու հարցը, իբրեւ կիպրական հարցի գլխաւոր խնդիրը։

Ան մատնանշեց, թէ թրքական կեցուածքը զարմանք չի պատճառէր իրեն, աւելցնելով որ իրականութեան մէջ, չորս ազատութիւններու վերաբերեալ իր պահանջներով, Անգարա կը հետապնդէ իր եւրոպական փաղձանքներու գոհացումը։

Պարոն Կոծեաս վերահաստատեց, որ Յունաստան, կիպրական հարցի բանակցութեան ներքին ոլորտէն ներս կ՛աջակցի պաշտօնական Նիկոսիոյ կատարած բոլոր ընտրանքներուն։ Ան կրկնեց նաեւ պաշտօնական Աթէնքի դիրքը, ունենալու կղզի մը, առանց օտար զօրքերու գերակշիռի, առանց երաշխիքներու համակարգի, ինչպէս նաեւ՝ առանց որեւէ տեսակի արտաքին երաշխիքի գրաւող ուժերու կողմէ։

Աւելցնել Ձեր մեկնաբանութիւնները