ԳՆԴԱՅԻՆ ՄԱՐՏԱՎԱՐԱԿԱՆ ԶՕՐԱՎԱՐԺՈՒԹԻՒՆ

Մարտ 22էն 25, Արցախի Հանրապետութեան Պաշտպանութեան բանակի 2017 թուականի պատրաստութեան ծրագիրին համաձայն՝ իրականացած  է գնդային մարտավարական զօրավարժութիւն, որուն եզրափակիչ փուլին ներկայ եղած են նաեւ Արցախի ղեկավարը եւ նախագահ Սարգսեան: Այս մասին կը յայտնէ Պաշտպանութեան Բանակի կայքը:

Զօրավարժութիւնը հնարաւորութիւն տուած է կատարելագործելու ներգրաւուած անձնակազմի տեսական եւ գործնական գիտելիքները, բարձրացնելու դաշտային վարժուածութեան մակարդակն ու անընդհատ փոփոխուող իրադրութեան մէջ որոշումներ ընդունելու ունակութիւնները:

Զօրավարժութիւնը անցած է ըստ նախատեսուած ծրագիրին եւ մէկ անգամ եւս ցոյց տուած, որ ինչպէս պայմանական, այնպէս ալ իրական մարտադաշտի մէջ պաշտպանութեան բանակը ի վիճակի է պատուով կատարելու իր առջեւ դրուած ցանկացած մարտական խնդիր եւ ապահովելու Արցախի Հանրապետութեան եւ անոր ժողովուրդին անվտանգութիւնը:

Զօրավարժութեան եզրափակիչ փուլին ներկայ եղած են Արցախի Հանրապետութեան եւ Հայաստանի Հանրապետութեան նախագահներ Բակօ Սահակեանն ու Սերժ Սարգսեանը: 

 

 

ՄԱՐԴՈՒ ԻՐԱՒՈՒՆՔՆԵՐՈՒ ԽԱԽՏՈՒՄ

Իրաւաբան-իրաւապաշտպաններու խումբը, Մարդու իրաւունքներու եւրոպական դատարան ներկայացուցած էր 2016ի Ապրիլ 2էն 5, ատրպէյճանական զինուած ուժերուն կողմէ Արցախի Հանրապետութեան քաղաքացիական բնակչութեան եւ զինծառայողներու իրաւունքներու խախտումներուն առնչութեամբ խումբ մը գանգատներ, որոնցմէ 23-ը արդէն ընդունուած է:

Tert.am-ի հետ զրոյցի մը ընթացքին՝ իրաւաբան-իրաւապաշտպան խումբի անդամ Արա Ղազարեան նշած է․«Մեզի համար բաւական անսպասելի էր, որ դատարանը արագացած կարգով սկսաւ այդ երկու տասնեակ գործերուն քննութիւնը, որ շատ դրական է: Հիմա կը սպասենք աւելի մեծ խմբաքանակի, որ կը վերաբերի տեղահանուածներուն վերաբերեալ գանգատներու մասով դատարանի դիրքորոշման` գործին քննութիւնը սկսելու կամ չսկսելու վերաբերեալ»:

Իրաւաբան-իրաւապաշտպան խումբի անդամ Արտակ Զէյնալեան, իր հերթին, նշած է, որ ինչպէս նախապէս, այնպէս ալ հիմա, իբրեւ մարդու իրաւունքներու եւ հիմնարար ազատութիւններու պաշտպանութեան միջազգային կառուցակազմ` Մարդկային Իրաւունքներու Միջազգային Դատրանէն կ՝ակնկալուի իրաւունքներու խախտման փաստի արձանագրութիւն, որու պարագային Ատրպէյճանը պարտաւոր պիտի ըլլայ արդարացի փոխհատուցում տրամադրել իրաւունքի խախտման զոհերուն:

Կը նշուի, որ ընդդէմ Հայաստանի գանգատներ ներկայացուցած է նաեւ դատարանին մէջ Ատրպէյճանի շահերը ներկայացնող Չինկիզ Ասքերովը: Այդ դիմումներուն քանակը կը հասնի 700-ի, սակայն դեռ ընդունուած է միայն 5-ը:

 

ՏԸ ՎԱԼԱՐՑԱԽ ԱԶՐՊԷՅՃԱՆԻ ՄԱՍ ՉԻ ԿՐՆԱՐ ԿԱԶՄԵԼ

Լեռնային Ղարաբաղի հակամարտութեան գօտիին մէջ նոր ռազմական գործողութիւնները կողմերուն համար անակնկալ չեն ըլլար. ապրիլեան պատերազմէն ետք երկու կողմերն ալ լաւ պաշտպանուած են, եւ ռազմական գործողութիւններու պարագային՝ այս անգամ աւելի մեծ շարժում պիտի ըլլայ: Այս մասին, ըստ Armenpress.am-ի, այսօր լրագրողներու հետ հանդիպման ընթացքին նշած է կովկասեան հարցերով բրիտանացի փորձագէտ Թոմաս տը Վալ:

«2016-ը շատ վտանգաւոր տարի էր: Իրավիճակի լարման հաւանականութիւն դեռ կայ, ամէն պարագայի այս տարին կրնայ աւելի վտանգաւոր ըլլալ նոր սպառազինութիւններու գործադրման տեսանկիւնէն: Հետեւաբար, մէկ անգամ եւս կ՝ընդգծենք, որ դիւանագիտութեան այլընտրանք չկայ»,-­ ըսած է Թոմաս տը Վալ:

Անոր խօսքով, կարեւոր է միջազգային դիւանագիտութեան բաւարար չափով ներգրաւուածութիւն: Թոմաս տը Վալի կարծիքով, անհրաժեշտ է լուրջ դերակատար, որ յանձնառու պիտի ըլլայ այս աշխատանքի իրականացման համար: Ան ընդգծած է, որ այսօր հիմնական խնդիրը ԵԱՀԿ Մինսկի ձեւաչափի ամրապնդումն է:

Աւելցնել Ձեր մեկնաբանութիւնները