Հայաստանի Հանրապետութեան Կեդրոնական ընտրական յանձնախումբին հրապարակած նախնական տուեալներուն համաձայն, 6-րդ գումարման Ազգային ժողովին մէջ ներկայացուած պիտի ըլլան Հայաստանի Հանրապետական կուսակցութիւնը (771 հազար 249 ձայն, կամ` ընտրողներուն 49.19 առ հարիւրը), «Ծառուկեան» դաշինքը (428 հազար 965 ձայն, կամ` ընտրողներուն 27.36 առ հարիւրը), «Ելք» դաշինքը (122 հազար 49 ձայն, կամ` ընտրողներուն 7.78 առ հարիւրը) եւ Հայ յեղափոխական դաշնակցութիւնը (103 հազար 173 ձայն, կամ` ընտրողներուն 6.58 առ հարիւրը):

Նախնական տուեալներու համադրութեամբ, կարելի է ըսել, որ ՀՀԿ-ն պիտի ունենայ 55 պատգամաւոր, «Ծառուկեան» դաշինքը` 30, «Ելք»-ը` 9, իսկ ՀՅԴ-ն` 7:

Պատգամաւորներու իրաւագիրներուն բաշխումը, նոր Ընտրական օրէնսգիրքին համաձայն, կը կատարուի հետեւեալ ձեւով. նախ` կուսակցութիւններու կամ կուսակցութիւններու դաշինքներու ստացած ձայներուն թիւը կը բազմապատկուի 101-ով (101-ը` Ազգային ժողովի պատգամաւորներու նուազագոյն թիւն է), ապա կը բաժանուի խորհրդարան անցած քաղաքական ուժերուն կողմ քուէարկած քուէաթերթիկներուն հանրագումարով:

Քաղաքական 4 ուժերուն ձայները առանձին պէտք է բազմապատկել 101-ով, ապա` արդիւնքը բաժնել 1 միլիոն 425 հազար 445-ի, որ քաղաքական 4 ուժերուն համար քուէարկած ընդհանուր թիւն է:

Այս հաշուարկը կատարելով կ՛ունենանք հետեւեալ պատկերը.

ՀՀԿ` ստացած ձայներուն թիւ (771249) x 101 / 1425445 = 54.6 իրաւագիր:

«Ծառուկեան» դաշինք` ստացած ձայներու թիւ (428965) x 101 / 1425445 = 30.3 իրաւագիր:

«Ելք» դաշինք` ստացած ձայներու թիւ (122049) x 101 / 1425445 = 8.6 իրաւագիր:

ՀՅԴ` ստացած ձայներու թիւ (103173 ) x 101 / 1425445 = 7.3 իրաւագիր:

Այս պատկերին հիմամբ ՀՀԿ-ն կը ստանայ 55 իրաւագիր, «Ծառուկեան» դաշինքը` 30, «Ելք»-ը` 9, իսկ ՀՅԴ-ն` 7:

Լրացուցիչ իրաւագիրներ` 4 իրաւագիր, նախատեսուած են նաեւ ազգային փոքրամասնութիւններուն համար:

Երէկ` 3 ապրիլին ունեցած իր յայտարարութիւններուն ընթացքին Հայաստանի Կեդրոնական ընտրական յանձնախումբի նախագահ Տիգրան Մուկուչեան ըսաւ. «Ասոնք նախնական տուեալներ են, որոնք տակաւին ստացուած են ելեկտրոնային եղանակով: Այսինքն, տեղամասային ընտրական յանձնախումբերէն արձանագրութիւնները կը բերուին տարածքային ընտրական յանձնախումբեր, այդ տուեալները կ՛անցուին համակարգիչներու մէջ, որմէ ետք արդէն մենք կը ստանանք թղթային արձանագրութիւնները, կը կատարուի ուսումնասիրութիւն, եթէ  բողոքներու դիմումներ ստանանք` նաեւ այդ ընթացքին կը տրուին համապատասխան որոշումներ եւ այդ ամբողջին համագումարումով  տեղի կ՛ունենայ ընտրութեան արդիւնքներու ամփոփումը», «Արմէնփրես»-ի հաղորդումով նշած է Մուկուչեան` աւելցնելով, որ ընտրութիւններու արդիւնքներուն վերջնական յայտարարութիւնը տեղի պիտի ունենայ կիրակի, 9 ապրիլին:

2 ապրիլին խախտումներու վերաբերեալ կային բազմաթիւ ահազանգներ. 200-է աւելի հեռաձայնային հաղորդակցութիւն միայն Կեդրոնական ընտրական յանձնախումբը ստացած է: Այս մասին լրագրողներու հետ զրոյցի մը ընթացքին ըսաւ Կեդրոնական ընտրական յանձնախումբի նախագահ Տիգրան Մուկուչեան:

Ան նշեց նաեւ, որ Կեդրոնական ընտրական յանձնախումբը հետեւած է տարբեր լրատուական կայքերով խախտումներու վերաբերեալ տեղեկատուութեան եւ փորձած առաւելագոյնս արագ միջոցներու ձեռնարկել` խախտումներու հանգամանքները պարզելու, զանոնք  կանխելու եւ հետագային բացառելու համար:  «Պէտք է նկատել, որ եղած են բազմաթիւ դէպքեր, երբ, հաղորդումներով պայմանաւորուած, ընտրական յանձնախումբի կա՛մ անդամները, կա՛մ նախագահները  այցելած են տեղամասային ընտրական յանձնախումբեր եւ տեղւոյն վրայ փորձած են պարզել հանգամանքները: Արձանագրուած են բողոքներ, բայց անոնք պէտք է ուսումնասիրուին, որմէ ետք միայն կրնանք յայտարարութեամբ հանդէս գալ», ըսաւ Մուկուչեան:

Աւելցնել Ձեր մեկնաբանութիւնները