ՀՅԴ Բիւրոյի երիտասարդական գրասենեակը կը հաղորդէ, որ 23-էն 26 մարտ 2017-ին Արժանթինի մէջ (Ռոզարիօ) տեղի ունեցաւ Ընկերվարական երիտասարդներու միջազգային միութեան Համաշխարհային խորհուրդի ժողովը: Ժողովին ներկայ էին միութեան անդամ կազմակերպութիւնները` շուրջ 200 ներկայացուցիչներով: ՀՅԴ Երիտասարդականը ժողովին մասնակցեցաւ երկու ներկայացուցիչով` Ֆլորենսիա Զանիքեան (ՀՅԴ Հարաւային Ամերիկայի երիտասարդական միութիւն) եւ Ընկերվարական երիտասարդներու միջազգային միութեան  փոխնախագահ եւ Սեւծովեան շրջանի համակարգող Կարօ Շատոյեան:

Ժողովին բացումին ելոյթով հանդէս եկան Արժանթինի ընկերվարական կուսակցութեան ատենապետ Անթոնիօ Փոնֆաթին, ինչպէս նաեւ տեղացի այլ բարձրաստիճան պաշտօնեաներ եւ եւրոպական կազմակերպութիւններու ներկայացուցիչներ:

Քննարկումներուն ժամանակ, Ընկերվարական երիտասարդներու միջազգային միութեան աւագ սերունդի ներկայացուցիչները  ներկայացուցին իրենց գործունէութեան շրջանին կատարուած աշխատանքները, ինչպէս նաեւ նոր սերունդին փոխանցեցին իրենց փորձառութիւնը եւ գիտելիքները:

Ընկերվարական երիտասարդներու միջազգային միութեան Սեւծովեան շրջանի փոխնախագահ Կարօ Շատոյեան իր ելոյթին ընթացքին խօսեցաւ  Եւրոպայի եւ յատկապէս Սեւծովեան շրջանին ընդհանուր տնտեսական խնդիրներուն, տագնապներուն, մարդու իրաւունքներուն առնչուող եւ այլ հարցերու մասին, անդրադառնալով նաեւ Արեւելեան երկիրներու եւ  Ռուսիոյ միջեւ փոխյարաբերութիւններու սրման` կոչ ուղղելով ներկաներուն աւելի մեծ ուշադրութիւն դարձնելու նշուած շրջանի խնդիրներուն:

Եռօրեայ համագումարին ընթացքին միութեան խորհուրդի ժողովը քննարկումներէ ետք ընդունեց շարք մը բանաձեւեր Պիելոռուսիոյ եւ Կիպրոսի իրավիճակին եւ կիներու իրաւունքներուն մասին, ինչպէս նաեւ տեղի ունեցան շրջանային հանդիպումներ, որոնց ծիրին մէջ ՀՅԴ Երիտասարդականը մասնակցեցաւ եւրոպական կոմիտէին` իբրեւ Սեւծովեան շրջանի անդամ:

Ժողովին եզրափակիչ օրը զուգորդուեցաւ 41 տարի առաջ Արժանթինի մէջ հաստատուած ամբողջատիրական կարգերուն դէմ պայքարի ընթացքին զոհուածներու յիշատակին նուիրուած ամէնամեայ քայլարշաւի օրուան հետ, որուն ներկայ գտնուեցան նաեւ ժողովին  մասնակիցները:

Ընկերվարական երիտասարդներու միջազգային միութեան Համաշխարհային խորհուրդը միութեան Համաշխարհային համագումարէն ետք հիմնական որոշում կայացնող ժողովն է, որ կը  գումարուի երկու տարին մէկ անգամ: Վերջին անգամ անիկա հիւրընկալուած էր Հայաստանի մէջ` 2015-ին:

Ընկերվարական երիտասարդներու միջազգային միութիւնը Ընկերվար միջազգայնականի ուղեկից երիտասարդական կազմակերպութիւնն է, որուն կ՛անդամակցին աւելի քան 143 կազմակերպութիւններ աշխարհի շուրջ 100 երկիրներէ: ՀՅԴ Երիտասարդականը միութեան լիիրաւ անդամ է:

Աւելցնել Ձեր մեկնաբանութիւնները