Հանրապետութեան նախագահ Նիկոս Անաստասիատիս յայտնեց, թէ մեր դիրքը կը մնայ նոյնը, թէ պատրաստ ենք որեւէ ատեն շարունակելու երկխօսութիւնը։

Եւրոպական Միութեան Մալթայի նախագահութեան առթիւ՝ Մալթայի դեսպանին սարքած ընթրիքին ժամանած պահուն, լրագրողներուն հետ ունեցած զրոյցի ընթացքին, նախագահ Անաստասիատիս, հարցապնդուելով, թէ գոյութիւն ունի՞ ենթահող, յառաջիկայ անմիջական շրջանին բանակցութիւններու վերսկսման համար, ան ըսաւ, «կը յուսամ այո՛»։ Մեր դիրքը կը մնայ նոյնը, թէ պատրաստ ենք որեւէ պահուն, շարունակելու երկխօսութիւնը, որ օգտակար պիտի հանդիսանայ մեզի, որպէսզի յանգինք լուծումի մը, բազմիցս ճշդուած շրջագիծէն ներս։

Հարցապնդուելով, եթէ թուրք-կիպրացի ղեկավարին հետ անցեալ գիշեր ունեցած իր ընթրիքի ժամանակ, զգաց թէ թուրք-կիպրական կողմը ականջ չի կախէր մեր մտահոգութիւններուն, նախագահ Անաստասիատիս ըսաւ, «չեմ ուզէր անդրադառնալ այս հարցին»։

Ան աւելցուց թէ թափուող բոլոր ջանքերը կը վերաբերին կիպրական հարցը լուծելու մե՛ր վճռակամութեան։ Առ նուազըն, այս է մեր կեցուածքը։ Այս է որ կը հաւատայ յոյն-կիպրական կողմը։

Այն հարցումին, թէ Թուրքիոյ հանրաքուէէն ետք կ՛ակնկալէ՞ թէ գոյութիւն պիտի ունենայ թրքական եւ թուրք-կիպրական կողմի կեցուածքի փոփոխութիւն, նախագահ Անաստասիատիս ըսաւ, «չեմ կրնար նախատեսել որեւէ բան»։

 

 

ՏՈՒԺԱՐԻՔ․ԵՐԿՈՒ ԿՈՂՄԵՐԸ ՊԱՐՏԱՒՈՐՈՒԹԻՒՆ ՍՏԱՆՁՆԱԾ ԵՆ

Նիւ Եորքէն, ՄԱԿ-ի Ընդհանուր Քարտուղարի ներկայացուցիչ Ստէֆան Տուժարիք յայտնեց, թէ կղզիի երկու ղեկավարները վերահաստատեցին իրենց միացեալ պարտաւորութիւնը, գտնելու լուծում մը, ի շահ՝ բոլոր կիպրացիներուն, ի մտի ունենալով երկու համայնքերու մտահոգութիւնները, նշելով միաժամանակ, թէ ՄԱԿ-ի Ընդհանուր Քարտուղարի Յատուկ Խորհրդական Էսփէն Պարթ Այտա պիտի շարունակէ կապի մէջ ըլլալ երկու ղեկավարներուն հետ, որպէսզի կարելի եղածին չափ շուտ հիմերը դնեն բանակցութիւններու վերսկսման համար։

Մամլոյ եւ Տեղեկատուութեան Գրասենեակի հաղորդած յայտարարութեան համաձայն, երէկ, Միացեալ Ազգերու նստավայրին մէջ, միջազգային կազմակերպութեան՝ միջազգային լրատուամիջոցներու ներկայացուցիչներու ուղղուած հերթական տեղեկատուութեան ընթացքին, Ընդհանուր Քարտուղարի ներկայացուցիչ Ստէֆան Տուժարիք յայտնեց, թէ Կիպրոսի մէջ՝ երկու համայնքներու ղեկավարները անցեալ Կիրակի ունեցան թափանցիկ եւ կառուցողական՝ գաղափարներու փոխանակում, վերջին ամսիներու ընթացքին դիմագրաւուող մարտահրաւէրներու կապակցութեամբ։

Աւելցնել Ձեր մեկնաբանութիւնները