Կիպրոսի Հանրապետութեան ուժանիւթային ծրագրումներուն մէջ՝ թրքական միջամտութիւնները եւ Թուրքիոյ մէջ տիրող ներկայ կացութիւնը զրոյցի առարկայ դարձան այսօր, Հանրապետութեան նախագահին եւ Ռազմավարական Ուսումնասիրութիւններու Խորհուրդի ամդամներուն միջեւ տեղի ունեցած հանդիպումի ընթացքին։

Ռատիօկայանի տեղեկութիւններուն համաձայն, հանդիպումին նախագահ Անաստասիատիս զեկուցում տուաւ ներկաներուն եւ յաջորդեց գաղափարներու փոխանակում, ո՛չ միայն տարածաշրջանին մէջ, այլ ընդհանրապէս՝ Թուրքիոյ հետապնդած ռազմավարական նպատակներուն, ինչպէս նաեւ՝ երկրի ներքին կացութեան մասին։

Նոյն տեղեկութիւններուն համաձայն, Հանրապետութեան նախագահին յանձնուած է Ռազմավարական Ուսումնասիրութիւններու Խորհուրդի զեկոյցը, Թուրքիոյ հարցին շուրջ։ Ինչ կը վերաբերի Թուրքիոյ Հանրաքուէին, Խորհուրդի անդամներուն կողմէ արտայայտուեցաւ ա՛յն համոզումը, թէ կանխահաս է եզրակացութեան յանգելու, թէ դէպի ու՞ր կ՛առաջնորդուի Թուրքիա։

Զրոյցի առարկայ դառձան նաեւ Ռուսիա-Թուրքիա եւ Միացեալ Նահանգներ-Թուրքիա յարաբերութիւնները, Թայիպ Էրտողանի եւ Տոնալտ Թրամփի միջեւ կայանալիք հանդիպումի լոյսին տակ։

Աւելցնել Ձեր մեկնաբանութիւնները