Կիպրական հարցի բանագնացներ Անտրէաս Մավրօյիաննիս եւ Օզտիլ Նամի նոր հանդիպում պիտի ունենան վաղը առաւօտ ժամը 9 ու կէսին։

Յաջորդ օրը, Կիպրոս պիտի գտնուի Միացեալ Ազգերու Ընդհանուր Քարտուղարի Յատուկ Խորհրդական Էսփէն Պարթ Այտա, որ անցեալ ուրբաթ, Ընդհանուր Քարտուղար Անթօնիօ Կուտերեսի հետ ունեցած հանդիպումէն ետք յայտնեց, թէ հինգշաբթի օր, երկու ղեկավարներուն հետ կայանալիք հանդիպումին, պիտի ներկայացնէ Ընդհանուր Քարտուղարի ունեցած որոշ գաղափարները։

Չորեքշաբթի օր, ծրագրուած է Հանրապետութեան նախագահի եւ Մուսթաֆա Աքընճը-ի հանդիպումը, Եւրոպական Քոմիսիոնի՝ կառուցային բարեկարգումներու աջակցութեան մնայուն խմբակը գլխաւորող՝ Marteen Verwey-ի հետ, զրոյցի նիւթ ունենալով թուրք-կիպրական համայնքի համարկումի պատասխանատու՝ ad hoc յանձնախումբի արձանագրած յառաջդիմութիւնը։

Եւրոպական Քոմիսիոնի ներկայացուցիչ պարոն Verwey-ի եւ Քոմիսիոնի նախագահի՝ կիպրական հարցի յատուկ պատուիրակ Peter Van Nufel-ի համաձայն, Մայիս 10-ին եւ 11-ին, Կիպրոսի մէջ տեղի պիտի ունենան հանդիպումներ, ծանօթանալու տիրող կացութեան եւ արձանագրելու յառաջդիմութիւնը, Եւրոպական Միութեան օրէնքներու հետ՝ թուրք-կիպրացիներու համարկման հարցին մէջ։

 

 

ԱՔԸՆՃԸ ԿԸ ՄԵՂԱԴՐԷ ՅՈՒՆԱԿԱՆ ԿՈՂՄԸ

«Արեւելեան Միջերկրականը պատերազմի փողի հնչումներու կարիքը չունի, այլ՝ խաղաղութեան եւ բարեկամութեան աւանդական երգերու», յայտնեց թուրք-կիպրացի ղեկավար Մուսթաֆա Աքընճը։

Երէկ, գրաւեալ Լուրուճինայի մէջ ելոյթ ունենալով, Մուսթաֆա Աքընճը մեղադրեց յոյն-կիպրական կողմը, յայտնելով որ նախագահական ընտրութիւններուն պատճառով, թուրք-կիպրական կողմի երկարած բարեկամութեան ձեռքին հանդէպ որեւէ քայլ չ՛առնէր, ինչպէս ըսաւ ան, աւելցնելով որ ան կ՛ակնկալէ, որ մինչեւ Յուլիս առնուի կառուցողական քայլ, կրկնելով որ թուրք-կիպրացիները, կղզիի բնական հարստութեան մէջ իրենց բաժինը ունին։

 

ԱՆԱՍՏԱՍԻԱՏԻՍ ԿԸ ՆԱԽԱԶԳՈՒՇԱՑՆԷ

Կառավարական Բանբեր Նիկոս Խրիստոտուլիտիս յայտնեց, թէ նախագահ Անաստասիատիսի՝ ՄԱԿ-ի Ընդհանուր Քարտուղարի Յատուկ Խորհրդականին ուղղուած՝ երէկուայ քննադատական ակնարկները նախազգուշացում կը համարուին Էսփէն Պարթ Այտայի նկատմամբ, որ պարտի աւելի զգուշ ըլլալ։ Ռատիօկայանի Երրորդ Յայտագրէն ելոյթ ունենալով, պարոն Խրիստոտուլիտիս մեղադրեց պարոն Այտային, թէ բանակցութիւններու այս ճակատագրական հանգրուանին, կ՛որդեգրէ սարսափեցուցիչ արտայայտութիւններ, որոնք թրքական կողմէն կը հնչեն ամենօրեայ դրութեամբ։

Ան կը մատնանշէ, թէ փոխանակ պարոն Այտա քննադատէ այս արարքները, ընդհակառակը՝ ան կը վկայակոչէ թրքական սպառնալիքները, որպէսզի անուղղակի քննադատութիւն կատարէ Կիպրոսի Հանրապետութեան ուժանիւթային ծրագրումներուն նկատմամբ։ Ա՛յն հարցումին, թէ պարոն Այտա կ՛աջակցի՞ թրքական դիրքերուն, պարոն Խրիստոտուլիտիս նշեց, թէ Ընդհանուր Քարտուղարի յատուկ խորհրդականը բանակցութեան սեղանին վրայ դիրք չէ բռնած եւ չի ալ կրնար բռնել, աւելցնելով սակայն, թէ հաւանաբար այդ մէկը կը կատարէ վարագոյրներու ետին։ Բանբերը շեշտեց, թէ նախագահ Անաստասիատիս նեղուած է, որ Այտա կը փորձէ բարձրացնել իր դերը բանակցային գործընթացին մէջ, հակառակ որ նոյնինքն Ընդհանուր Քարտուղարը չի փափաքիր ունենալ այդպիսի դեր մը։ Ան շեշտեց, թէ կառավարութիւնը պիտի չկրկնէ 2004-ի սխալները եւ իր համամտութիւնը պիտի չտայ Միացեալ Ազգերու դերի ամրապնդման։ Պարոն Խրիստոտուլիտիս մատնանշեց, որ նախագահ Անաստասիատիս մտադրութիւն չունի խնդրելու, որ Միացեալ Ազգերու Ընդհանուր Քարտուղարը իր յատուկ խորհրդականը տուն կանչէ։

Աւելցնել Ձեր մեկնաբանութիւնները