www.artsakank.com.cy — Նիկոսիա — 21.05.2017 — Երէկ երեկոյեան, Սթրովոլոսի Քաղաքապետարանի՝ ծայրէ ի ծայր լեցուած հանդիսասրահի մէջ, 850 հոգիի ներկայութեամբ, տեղի ունեցաւ Համազգային Մշակութային եւ Կրթական Ընկերակցութեան Նիկոսիոյ «Օշական» մասնաճիւղի տարեկան բացառիկ ելոյթը, տաղանդաւոր լիբանանահայ պարուսոյց Գրիգոր Քէլէշեանի գեղարուեստական ղեկավարութեամբ, 3 պարախումբերու մասնակցութեամբ. Համազգայինի Նիկոսիոյ «Սիփան», Պաֆոսի «Անի», ինչպէս նաեւ՝ Պետական Ներկայացուցիչ Վարդգէս Մահտեսեանի նախաձեռնութեամբ հիմնուած՝ «Նանοր» պատանեկան պարախումբերու, որոնց անդամներու ընդհանուր թիւը կը հասնէր 130-ի։

Մուտքի տոմսերը օրեր առաջ արդէն սպառած էին։ Ներկայ էին նաեւ բազմաթիւ պետական պաշտօնակատարներ, երեսփոխաններ, դեսպաններ եւ հիւպատոսներ, ինչպէս նաեւ համայնքային կառոյցներու եւ կազմակերպութիւններու ներկայացուցիչներ։

Երեք պարախումբերը յաջորդաբար ներկայացուցին 18 հայկական ազգագրական եւ օտար պարերու փունջ մը։ Յայտագիր մը, որ կը ներառէր նաեւ Վրացական, Մոլտավական եւ Քնչուներու պարեր, ինչպէս նաեւ՝ նաեւ սիրային նիւթով թեմադիկ ներկայացում մը, «Ախթամար» խորագրով։

Յայտագրի աւարտին բեմ բարձրացան 3 պարախումբներու՝ 130 պարողները, Քոհար Սիմֆոնիք նուագախումբի «Tetmajazz» ծանօթ մեղեթիով, կատարելու ելոյթի «ֆինալէ»ն։ Ներկաները երկար ժամանակ շնորհաւորեցին կատարողները, յոտընկայս եւ որոտընդոստ ծափողջիւններով։

Աւելցնել Ձեր մեկնաբանութիւնները