Միացեալ Նահանգներու Քալիֆորնիա նահանգը ներկայացնող հանրապետական քոնկրեսական Տանա Ռոհրպաչըր կոչ ուղղած է արգիլելու Թուրքիոյ նախագահ Ռեճեփ Թայիպ Էրտողանի այցելութիւնը Միացեալ Նահանգներ:

Ըստ «Ազդակ»-ի՝ ներկայացուցիչներու տան Եւրոպայի եւ Եւրասիոյ հարցերով արտաքին յարաբերութիւններու ենթայանձնախումբի նախագահող քոնկրեսականը՝ լսումներու ընթացքին՝ Մայիս 16-ին, Ուաշինկթընի մէջ Էրտողանի թիկնապահներուն կողմէ խաղաղ ցուցարարներու դէմ գործուած յարձակումը քննելու ընթացքին նշելէ ետք, թէ յարձակումը տեղի ունեցած է Ուաշինկթընի մէջ Թուրքիոյ դեսպանատան առջեւ եւ Էրտողանի ներկայութեամբ, պահանջած է արգիլել Էրտողանի այցելութիւնը երկիր:

«Այդ զզուելի եւ ֆաշական յարձակումին տեսագրութիւնը սահմռկեցուցիչ է: Առնուազն 11 անմեղ ամերիկացիներ արիւնահեղութեան ենթարկուած են: Բացի ատկէ, որոշ թիկնապահներ այնքան յանդգնութիւն ունեցած են, որ ձեռնամարտի բռնուած են ամերիկացի օրինապահներու հետ: Մինչ այդ, Էրտողան հանգիստ կը նայէր կատարուածին: Կը դժուարանամ հաւատալ, որ այդպիսի կազմակերպուած անվտանգութեան ծառայութեան անդամները կրնային այդպիսի ջարդ կատարել` առանց ղեկավարի հրահանգին»,- շեշտած է քոնկրեսականը:

Աւելցնել Ձեր մեկնաբանութիւնները