Երկուշաբթի, 29 Մայիս 2017-ի առաւօտեան ժամը 11-ին, Թեմիս Կաթողիկոսական Փոխանորդ՝ Տ. Խորէն Արք. Տողրամաճեան եւ Պետական Ներկայացուցիչ՝ Պրն. Վարդգէս Մահտեսեան հանդիպում մը ունեցան Կիպրոսի Հանրապետութեան Նախագահ՝ Պրն. Նիքոս Անասթասիատիսի հետ:
Հանդիպումը ծանօթացման բնոյթ ունէր: Առաջին հերթին վսեմաշուք Պրն. Նախագահը, իր ուրախութիւնը յայտնեց Սրբազան Հօր նոր առաքելութեան ստանձման եւ յունարէնով արտայայտման համար: Շուրջ 30 վայրկեան խօսակցութիւնները ընդհանրապէս կենդրոնացան Կիպրոսի, Կիպրահայութեան եւ մասնաւորաբար Հայաստանի հետ պետական յարաբերութեանց մասին, նշելով նաեւ 2015ին, Հայոց Ցեղասպանութեան 100ամեակին անձամբ ներկայ գտնուիլը Հայաստան:

Anastasiades - Arch. Khoren


Սրբազանը լսելէ ետք Պրն. Նախագահն ու Ներկայացուցիչը Կիպրոսն ու հայութիւնը յուզող տարբեր հարցերու շուրջ, իր կարգին նախ պաշտօնապէս շնորհակալութիւն յայտնեց ընդունելութեան համար, հակառակ անոր բազմազբաղ վիճակին եւ ունեցած հեւքոտ օրակարգերուն, երկիրը տագնապեցնող ու մտահոգող խնդիրներով եւ ապա, անդրադարձաւ երկու ժողովուրդներու ունեցած դարաւոր սիրալիր յարաբերութեանց եւ նոյն ճակատագրին ենթարկման թէ՛ որպէս ժողովուրդ եւ թէ՛ որպէս հայրենիք:
Հանդիպումի աւարտին յիշատակի պատկերներ առնուեցան եւ անգամ մը եւս Պրն. Նախագահը իր դրական աջակցութիւնն ու զօրակցութիւնը յայտնեց Սրբազան Հօր եւ Կիպրահայ գաղութի նկատմամբ: Իրենց կարգին Սրբազանն ու Պետական Ներկայացուցիչը պաշտօնապէս կիպրահայութեան եւ հայութեան անունով իրենց շնորհակալութիւնն ու երախտագիտութիւնը յայտնեցին Պրն. Նախագահին հայութեան հանդէպ թէ՛ Կիպրոսի եւ թէ՛ Հայաստանի նկատմամբ իր ցուցաբերած սերտ յարաբերութեան եւ զօրակցութեան համար:

Դիւան Ազգային Առաջնորդարանի
29 Մայիս 2017

Աւելցնել Ձեր մեկնաբանութիւնները