Կիպրական կառավարութիւնը տակաւին զեկուցում չէ ստացած Էսփէն Պարթ Այտայի՝ Թուրքիոյ մէջ կատարած հանդիպումներու պարունակութեան մասին, ո՛չ ալ գիտէ, եթէ ընդհանուր քարտուղարին յատուկ խորհրդականը պիտի վերադառնայ Կիպրոս։

Այս մէկը Ռատիօկայանի Երրորդ Յայտագրին յայտնեց Կառավարութեան Բանբեր Նիկոս Խրիստոտուլիտիս, աւելցնելով սակայն, թէ եթէ նոր իրադառձութիւններ ունենանք, պարոն Այտա պիտի կապուի նախագահ Անաստասիատիսի եւ յունական կառավարութեան հետ, կամ պիտի վերադառնայ Կիպրոս։

Մեզի կը հետաքրքրէ, աւելցուց պարոն Խրիստոտուլիտիս, թէ Թուրքիա պատրա՞ստ է զրուցելու անվտանգութեան եւ երաշխիքներու ոլորտները, որդեգրելով յստակ դիրքեր, որոնք պիտի արտօնեն որ յառաջդիմութիւն արձանագրուի։

Հակառակ պարագային, աւելցուց ան, անել կացութեան առջեւ պիտի գտնուինք։

Կառավարական Բանբերը մատնանշեց, թէ եթէ Անգարայի դիրքերը անոնք են, որոնք Թուրքիոյ արտաքին գործոց նախարարը արծարծեց, վերջերս տուած իր հարցազրոյցին մէջ, երկխօսութեան եւ յառաջդիմութեան հնարաւորութիւն չի կրնար ըլլալ։

Ան նշեց սակայն, թէ կառավարութիւնը պիտի սպասէ նաեւ, տեսնելու թէ Մէվլութ Չավուշօղլու ինչպիսի՞ ակնարկներ պիտի կատարէ վաղը, երբ պիտի գտնուի կղզիի գրաւեալ բաժինին մէջ։

 

ՅԱՋՈՐԴ ՕՐԵՐՈՒՆ ՉԻ ԲԱՑԱՌՈՒԻՐ ՂԵԿԱՎԱՐՆԵՐՈՒ ՀԱՆԴԻՊՈՒՄ

Արտաքին Գործոց նախարար Իոաննիս Կասուլիտիս կը գնահատէ, թէ յաջորդ օրերուն չի բացառուիր որ համաձայնութիւն կայանայ, որ տեղի ունենայ հանդիպում նախագահ Անաստասիատիսի եւ թուրք-կիպրացի ղեկավար Մուսթաֆա Աքընճը-ի միջեւ։

Ելոյթ ունենալով Ռատիօկայանի «Էտօ կէ Տորա» հաղորդումէն, պարոն Կասուլիտիս վերագրեց իր գնահատումը ա՛յն իրողութեան, որ նախագահ Անաստասիատիս ընդունեց Էսփէն Պարթ Այտայի՝ Մուսթաֆա Աքընճը-ին հանդիպելու առաջարկը, դիւանագիտութեան երուզեռի ձախողութենէն ետք։ Պարոն Աքընճըն, աւելցուց ան, հրապարակային կերպով «ոչ» չըսաւ այդպիսի հանդիպումի մը։

Պարոն Կասուլիտիս ըսաւ, թէ բանացկութիւնները չեն ձախողած եւ թէ այլընտրանքային ծրագիր գոյութիւն չունի, շեշտելով որ յոյն-կիպրական կողմը պիտի շարունակէ ջանք թափել, մինչեւ որ առաջնորդէ կիպրական հարցը լուծումի, որ պիտի վայելէ նաեւ ժողովուրդի վաւերացումը։

Աւելցնել Ձեր մեկնաբանութիւնները