Ընտրական Ատեանին համաձայն, Էլէնի Թէօխարուսի գլխաւորած «Ալիլենկիի» Շարժումը պիտի կորսնցնէ անցեալ տարուայ Խորհրդարանական ընտրութիւններուն՝ Լիմասոլի մէջ յաղթած իր աթոռը։ Դատարանը չեղեալ նկատեց Եորղոս Պապատոպուլոսի ընտրութիւնը, իբրեւ Լիմասոլի ընտրատեղամասի երեսփոխան։

Թափուր մնացած աթոռի լրացման համար տեղի պիտի ունենան լրացուցիչ ընտրութիւններ։

Ընտրական Ատեանին դիմած էր ՏԻՍԻ-ի Լիմասոլի նախկին երեսփոխան Անտրէաս Միխայիլիտիս, որ կը պնդէր, թէ Էլէնի Թէօխարուսի շահած աթոռը, պէտք չէր շնորհուէր Եորղոս Պապատոպուլոսին, որ Թէօխարուսէն ետք, Լիմասոլի մէջ՝ «Ալիլենկիի» Շարժումի անուանացանկին վրայ ամենաբարձր թիւով քուէ ստացողն էր։

Ինչպէս ծանօթ է, Թէօխարուս հրաժարած էր իր շահած աթոռէն, պահելով իր Եւրոխորհրդարանի աթոռը։

«Յարգելի է Ընտրական Ատեանի առած որոշումը, յայտնեց Թէօխարուս։ Ռատիօկայանի «Ապօ Մերա Սէ Մերա» հաղորդումէն ելոյթ ունենալով, ան աւելցուց որ աթոռը կը պատկանի «Ալիլենկիի»ին եւ թէ Շարժումը կ՛ակնկալէ Ընդհանուր Դատախազի վճիռը, թէ ինչպէ՞ս պիտի կատարուի թափուր աթոռի լրացումը, մատնանշելով միաժամանակ, թէ Ընտրական Ատեանը չէ որոշած թէ աթոռը չի պատկանիր «Ալիլենկիի» Շարժումին։

Որոշումը այն է, ըսաւ Թէօխարուս, որ Եորղոս Պապատոպուլոսի ընտրութիւնը չեղեալ կը նկատուի։

Աւելցնել Ձեր մեկնաբանութիւնները