www.artsakank.com.cy — 18.07.2017 — Ժորժ Քեփենեկեանը Լիոնի նոր քաղաքապետն է: Լիոնի քաղաքային խորհուրդը երէկ այդ պաշտօնին ընտրեց հայ թեկնածուն: Խորհուրդի 72 անդամներէն անոր թեկնածութեան օգտին քուէարկեցին 49-ը: 67-ամեայ հայ գործիչը յաջորդեց Ժերար Քոլոմին, որ արդէն նշանակուած է ներքին գործոց նախարար: Քեփենեկեանի թեկնածութիւնը առաջադրած էր նոյնինքն Քոլոմ:

Քեփենեկեան 2014-էն Քոլոմի առաջին տեղակալն էր: Ան աշխուժ ներդրում ունեցած է Լիոնի զարգացման գործին մէջ եւ ներգրաւուած՝ Հայոց ցեղասպանութեան ճանաչման հոլովոյթին մէջ: Ֆրանսայի հայկական կազմակերպութիւններու խորհուրդի համանախագահ, ՀՅ Դաշնակցութեան Բիւրոյի անդամ Մուրատ Փափազեան պատմական որակեց Քեփենեկեանի ընտրութիւնը:

Վերջինս աշխուժ մասնակցութիւն ունի հայ համայնքի կեանքին մէջ: Կանուխ տարիքէն անդամակցած է Հայ Յեղափոխական Դաշնակցութեան: «Ինք բաւական օգնած է հայկական հաստատութիւններուն: Աշխատած է իբրեւ Լիոնի փոխքաղաքապետ: Ան բաւական փայլուն ներկայութիւն ունեցած է Լիոնի մէջ, զարգացուցած է մշակութային քաղաքականութիւնը», ըսած է Փափազեան, աւելցնելով որ Ֆրանսայի քաղաքական դաշտին մէջ հայերուն համար դրական պատկեր ստեղծուած է` հաշուի առնելով, որ Յունիսի խորհրդարանական ընտրութիւններուն 3 հայ երեսփոխաններ ընտրուած են: Փափազեանի կարծիքով, երկրի երկրորդ մեծագոյն քաղաքի ղեկավարին հայ ըլլալու փաստը կարեւոր դռներ պիտի բանայ Հայաստանի համար: Նախկին նախագահ` Ֆրանսուա Հոլլանտի հայամէտ քաղաքականութիւնը, Փափազեանի համաձայն, իրենց բաւարարած է: Հիմա նոյնը կ՛ակնկալեն Ֆրանսայի նոր նախագահ Էմանուէլ Մաքրոնէն:

Աւելցնել Ձեր մեկնաբանութիւնները