25.07.2017 — www.artsakank.com.cy — Երեւանէն՝ Կիպրոսի պատուիրակութեան մամլոյ բանբերէն ստացուած տեղեկութիւններու համաձայն, այսօր, Համա-ՀՄԸՄ-ական 10-րդ Մարզախաղերու երրորդ օրուայ աւարտին, Կիպրոսի ՀՄԸՄ-ՀԵՄ-ի մարզիկներու խումբը կը շարունակէ իր յաղթական երթը։

Այս առաւօտ, 20-ամեայ Էտմոնտ Այնէճեան, Երեւանի մէջ մասնակցելով թենիսի մրցաշարքի առաջին փուլին, ուր կը մրցին աշխարհի չորս ծագերէն Հայաստան ժամանած 16 հայ թենիսմէններ, մրցեցաւ Արժանթինէն՝ Նիքոլաս Տէյիրմէնճեանին դէմ, որուն պարտութեան մատնեց 6-1, 6-0 արդիւնքով։

Առաջին փուլէն յաղթական դուրս եկող մարզիկները անցան յաջորդ փուլին, այսինքն՝ քառորդ աւարտականին, որ տեղի պիտի ունենայ Հինգշաբթի 27 Յուլիսին։ Այնէճեան պիտի մրցի ֆրանսահայ Հրաչ Մակարեանին դէմ։

1 ոսկի մետալակիր՝ 15-ամեայ Միքելա Այնէճեան կը շարունակէ իր աթլեթի մրցումները վաղը, մրցելով 800 մեթր վազքի մրցումին։

3 ոսկի մետալակիր՝ լողորդ Մարի ՍոմաքեանԵորղիու կը շարունակէ իր մրցումներու շարքը Ուրբաթ օր, 50 մեթր butterfly, 100 մեթր freestyle եւ 4×50 մեթր խառն ոճի մրցումներով։

Աւելցնել Ձեր մեկնաբանութիւնները