Գերմանիոյ խորհրդարանին կողմէ անցած տարուան Յունիսին ընդունուած` Հայոց Ցեղասպանութիւնը ճանչցող բանաձեւի համահեղինակներէն Կանաչներու կուսակցութեան համանախագահ Ճեմ Օզտեմիր մեկնաբանած է Թուրքիոյ նախագահ Ռեճեփ Թայիփ Էրտողանի այն յայտարարութիւնը, որմով ան գերմանաբնակ թուրքերուն կոչ ըրած էր յառաջիկայ խորհրդարանական ընտրութիւններուն չքուէարկելու Քրիստոնէա-ժողովրդավարական միութեան Ընկերվար-ժողովրդավարական կուսակցութեան ու Կանաչներու օգտին` զանոնք որակելով «Թուրքիոյ թշնամիներ»:

Օզտեմիր «Deutsche Welle»-ի թրքական ծառայութեան տուած հարցազրոյցի ընթացքին ըսած է, թէ ուրախ է, որ իրենց կուսակցութիւնը Էրտողանի «սեւ ցուցակ»-ին մէջ է:

«Լաւ է, որ այդ ցուցակի մէջ ենք: Եթէ չըլլայինք, հիասթափութիւն պիտի ապրէինք: Եթէ Էրտողան խորհուրդ չի տար քուէարկելու մեր օգտին, կը նշանակէ ճիշդ ուղիի վրայ ենք: Մեզի համար պատիւ է այդ ցուցակին մէջ ըլլալը»,- ըսած է Օզտեմիր:

Սեպտեմբեր 24-ին Գերմանիոյ մէջ սպասուող խորհրդարանական ընտրութիւններուն ընդառաջ` Թուրքիոյ նախագահ Թայիփ Էրտողան Գերմանիոյ մէջ բնակող իր հայրենակիցներուն կոչ ուղղած էր չսխալիլ եւ ձայն չտալ «Թուրքիոյ թշնամի» կուսակցութիւններուն: Գերմանիոյ ընկերվար-ժողովրդավարական կուսակցութեան ղեկավար Մարթին Շուլց, մեկնաբանելով Թուրքիոյ նախագահի յայտարարութիւնը, ըսած էր` «էրտողան ամբողջութեամբ կորսնցուցած է իր չափի զգացողութիւնը»:

Աւելցնել Ձեր մեկնաբանութիւնները