ԵՐԵՒԱՆ — 2 Սեպտեմբերին, «Եռաբլուր» զինուորական պանթէոնին մէջ տեղի ունեցաւ Արցախի Հանրապետութեան հռչակման 26ամեակին նուիրուած Հայ Յեղափոխական Դաշնակցութեան կազմակերպած ոգեկոչման արարողութիւնը, որուն ընթացքին Դաշնակցութեան շարքերուն միացան 114 նորագիրներ:

Նախ տեղի ունեցաւ հոգեհանգստեան արարողութիւն՝ ի յիշատակ պանթէոնին մէջ ամփոփուած հայորդիներուն, որոնց կեանքին գնով այսօր ունինք անկախ ու ազատագրուած հայրենիք:

Հայկական երկու հանրապետութիւններու քայլերգներէն ետք, որոնք հնչեցին ՀՄԸՄ-ՀԱՍԿի շեփորախումբին կողմէ, բացման խօսքով հանդէս եկաւ ՀՅԴ Բիւրոյի անդամ, Բիւրոյի Հայ Դատի եւ քաղաքական հարցերու գրասենեակի պատասխանատու Կիրօ Մանոյեան: Ան հաստատեց, որ 2 Սեպտեմբեր 1991ին տրուած որոշումը իսկական անհրաժեշտութիւն էր, որովհետեւ մէկ կողմէ, կը գոհացնէր Արցախի ժողովուրդին ձգտումը՝ Ատրպէյճանէն անկախ ապրելու, նաեւ այդ նպատակին իրականացումը կը դնէր օրուան քաղաքական իրավիճակի փաստերուն վրայ, միւս կողմէ, այդ կամքի դրսեւորումը իրականութիւն կը դարձնէր Խորհրդային Միութեան օրուան օրէնքներու տառին ու ոգիին համապատասխան», իր խօսքին մէջ հաստատեց Մանոյեան՝ նշելով, որ այս օրը, տօնական ըլլալով հանդերձ, պատմական է:

Ըստ Մանոյեանի՝ 2 Սեպտեմբերի որոշումը մարտավարական քայլ էր: «Ինչպէս Արցախի մէջ պիտի ըսէին՝ Արցախի Հանրապետութեան անկախութեան միջազգային ճանաչումը Հայաստանի հետ վերամիաւորման ամէնէն կարճ ճամբան է: Այս ճամբուն վրայ անհրաժեշտ կը նկատենք Հայաստանի եւ Արցախի հանրապետութիւններուն միջեւ ռազմաքաղաքական համագործակցութեան պայմանագիրի ստորագրութիւնը: Պայմանագիր, որ պատրաստուած է 2016ի ապրիլեան քառօրեայ կռիւներէն ետք», շեշտեց Մանոյեան:

Ան դիտել տուաւ,  որ Արցախի սահմանները ճշդելու ատեն պէտք է առաջնորդուիլ պատմական իրաւունքի եւ Արցախի ու Հայաստանի անվտանգութեան իրական աշխարհագրական տարածքային երաշխիքներու սկզբունքով: «Բանակցային գործընթացին մէջ պէտք է առաջնորդուիլ Արցախի ժողովուրդին 1991 թուականի անկախութեան եւ 2006 ու 2017 թուականներու Լեռնային Ղարաբաղի Սահմանադրութեան ընդունման եւ փոփոխութիւններու համաժողովրդական հանրաքուէներով արդէն իսկ կայացած կամքի արտայայտութեամբ», նկատել տուաւ ան, ապա անգամ մը եւս յայտարարեց, որ Դաշնակցութիւնը կը շարունակէ Լեռնային Ղարաբաղի ճանաչման հարցի հետապնդումը:

Խօսելով զիջումներուն մասին, Մանոյեան անգամ մը եւս լուսարձակի տակ առաւ ՀՅԴի դիրքորոշումը: «Դաշնակցութիւնը դէմ է միակողմանի զիջումներուն, փոխադարձ զիջումները կրնան ըլլալ միայն համարժէք, միաժամանակեայ եւ փաթեթային լուծման շրջանակներուն մէջ. ՀՅԴն կողմնակից է Հայաստանի կողմէ Արցախի անկախութեան ճանաչման՝ բանակցային գործընթացի ձախողութեան կամ Ատրպէյճանի կողմէ զինուորական յարձակման պարագային», ըսաւ Մանոյեան:

Ապա ՀՅԴ Բիւրոյի քաղաքական ներկայացուցիչ Արմէն Ռուստամեանի կնքահայրութեամբ տեղի ունեցաւ 114 նորագիրներու մուտքը Դաշնակցութեան շարքերը:

Այնուհետեւ ազգային, յեղափոխական երգերով ներկաները շարունակեցին տօնել Արցախի անկախութեան 26ամեակը:

Աւելցնել Ձեր մեկնաբանութիւնները