Նախագահութեան թեկնածու Ստավրոս Մալաս յարձակողականի անցաւ նախագահ Անաստասիատիսի դէմ, կիպրական հարցի վերաբերեալ՝ իր կատարած տնօրինումներուն կապակցութեամբ։

Պաշտօնական առաջին մամլոյ ասուլիսի ընթացքին, Ստավրոս Մալաս շեշտեց, թէ կիպրական հարցի նկատմամբ, Անաստասիատիսի քաղաքականութիւնը ձախողեցաւ, որովհետեւ ան բանակցութիւնները վարեց անյաջող կերպով, առանց նպատակի, ծրագրի եւ դաշնակիցի, այս ձեւով վնաս հասցնելով, ինչպէս ըսաւ ան, միջազգային գետնի վրայ, Կիպրոսի արժանահաւատութեան։

Ան աւելցուց, թէ պարոն Անաստասիատիս շարունակ կը շեղի իր նպատակէն, իսկական նպատակ ունենալով կեդրոն-աջի քուէներու կեդրոնացումը, իբրեւ հետեւանք, բուռն հարուած հասցնելով կիպրական հարցի լուծման գործընթացին։

Ան մեղադրեց զինք նաեւ, որ ա՛յն տպաւորութիւնը կուտայ, թէ չի գիտէր թէ ինչ կ՛ուզէ եւ թէ յարափոփոխ վերաբերմունք կը ցուցաբերէ։

Պարոն Մալաս նշեց, թէ Կիպրոսի Հանրապետութեան ուժը, միջազգային օրէնքն է եւ այդ պատճառով պէտք է, ինչպէս ըսաւ ան, կեդրոնացած մնանք Միացեալ Ազգերու պահանջներուն, այսինքն՝ որ բանակցութիւնները շարունակուին ա՛յն կէտէն, որ ընդհատուեցան։

Ան շեշտեց նաեւ, թէ պէտք է վերագտնենք մեր կորսուած արժանահաւատութիւնը, պատասխանատու, հետեւողական եւ սկզբունքներէ մեկնող քայլերով, գործակցելով ՄԱԿ-ի Ընդհանուր Քարտուղարին հետ, համապատասխան բանաձեւերու շրջագիծէն ներս։

Աւելցնել Ձեր մեկնաբանութիւնները