ՀՅԴ Բիւրոյի Երիտասարդական գրասենեակի հրաւէրով երկօրեայ այցով Արցախ ժամանած են Ընկերվար երիտասարդներու միջազգային միութեան խումբ մը ներկայացուցիչներ` 17 երկրէ 25 պատուիրակ: Երիտասարդները երէկ հանդիպում ունեցած են Արցախի Հանրապետութեան մշակոյթի, երիտասարդութեան եւ զբօսաշրջութեան փոխնախարար Գայիանէ Գրիգորեանի հետ, որ ներկայացուցած է երիտասարդական ոլորտին մէջ տարուող պետական քաղաքականութեան հիմնական ուղղութիւնները:

Ընկերվար քաղաքական գործիչները հետաքրքուած են Արցախի երիտասարդութեան զբաղուածութեան, ոլորտի ֆինանսաւորման, զինուորական ծառայութեան, սահմանամերձ շրջաններու բնակիչներու ուսման իրաւունքներուն վերաբերող հարցերով: Աշխարհի տարբեր երկիրներէ ժամանած երիտասարդները Սեպտեմբեր 30-ին այցելած են նաեւ Halo Trust ականազերծման միջազգային կազմակերպութեան արցախեան գրասենեակ, իսկ երէկ` Ստեփանակերտի «Թումօ» ստեղծարար արհեստագիտութիւններու կեդրոն: Դէպի Արցախ այցելութիւնը եզրափակուած է տեսարժան վայրեր այցելութեամբ:

Կիպրոսի Էտէք ընկերվարական կուսակցութեան արտաքին յարաբերութիւններու քարտուղար Եորղոս Իրոտոթու նշած է, որ մինչեւ Արցախ այցելելը քիչ մը կասկածամտօրէն կը վերաբերէր այստեղի իրավիճակին, բայց տեսնելէն ետք հասկցաւ, որ Արցախը ծաղկման ժամանակաշրջանի մէջ կը գտնուի եւ բաւական զարգացած է:

Աւելցնել Ձեր մեկնաբանութիւնները