Երէկ, Ռուսիոյ Դաշնութեան նախագահ Վլատիմիր Փութին, Ռուսիոյ Դաշնութեան մօտ՝ Կիպրոսի Հանրապետութեան նորանշանակ դեսպան Լէոնիտաս Մարքիտիսի հաւատարմագրի յանձնումի յատուկ արարողութեան ծիրէն ներս շեշտեց, թէ Ռուսիա հետեւողական կերպով աջակից է կիպրական հարցի համապարփակ, արդար եւ իրագործելի կարգաւորման, համաձայն Միացեալ Ազգերու Կազմակերպութեան Ապահովութեան Խորհուրդի բանաձեւերուն։

Մամլոյ եւ Տեղեկատուութեան Գրասենեակի տարածած յայտարարութեան համաձայն, հաւատարմագրի յանձնումի ընթացքին ելոյթ ունենալով, նախագահ Փութին բացատրեց ռուսական արտաքին քաղաքականութեան հիմնական առանձքները, նշելով անոր առաջնահերթութիւնները, ինչպէս նաեւ՝ միջազգային գետնի վրայ, Ռուսական Դաշնութեան սկզբունքային դիրքերը։

Անդրադառնալով Կիպրոսի, ան ըսաւ թէ Կիպրոսի Հանրապետութեան հետ յարաբերութիւնները կը զարգանան առագընթաց, մատնանշելով թէ անոնք հիմնուած են երկու ժողովուրդներու մշակութային եւ հոգեւոր եղբայրութեան վրայ։

Միաժամանակ, Վլատիմիր Փութին արտայայտեց ա՛յն համոզումը, թէ իբրեւ հետեւանք, նախագահ Նիկոս Անաստասիատիսի՝ Հոկտեմբերի աւարտին Ռուսիա կատարելիք այցելութեան, պիտի ստորագրուին երկ-կողմանի կարեւոր փաստաթուղթեր, զանազան մարզերէ ներս։ Հաւատարմագրի յանձնման արարողութենէն ետք, ռուս նախագահին հետ ունեցած կարճ խօսակցութեան ընթացքին, Դեսպան Մարքիտիս շնորհակալութիւն յայտնեց Վլատիմիր Փութինին, կիպրական հարցի նկատմամբ ցուցաբերուող մշտական եւ հաստատ զօրակցութեան համար եւ նոյն պահուն վստահեցուց զինք իր ստանձնած պարտաւորութեան նկատմամբ, աշխատելու Ռուսիոյ եւ Կիպրոսի միջեւ գոյութիւն ունեցող երկ-կողմանի բացառիկ յարաբերութիւններու յաւելեալ ամրապնդման համար։

Աւելցնել Ձեր մեկնաբանութիւնները