Արտաքին Գործոց նախարար Իոաննիս Կասուլիտիս շեշտեց, թէ Կիպրոսի Հանրապետութիւնը, կղզիի գրաւեալ բաժինի վարչակարգին պիտի չվճարէ որեւէ հարկ, կղզիի հիւսիսային բաժնին մէջ գտնուող յոյն-կիպրացիներու համար ուղարկուած մթերքներու համար։

Ան նշեց նաեւ, թէ Միացեալ Ազգերու խաղաղապահ ուժերը իրաւունք չունին վճարելու  “հարկերը”, ո՛չ ալ ունին անհրաժեշտ գումարները, այդպիսի վճարումներ կատարելու համար։

Ելոյթ ունենալով Ռատիօկայանի Երրորդ Յայատագրէն, պարոն Կասուլիտիս յայտնեց, թէ այս հարցը երէկ երեկոյեան զրուցեց ՄԱԿ-ի Ընդհանուր Քարտուղարի Կիպրոսի ներկայացուցիչ Էլիզապէթ Շպեհըրի հետ։

Եթէ չփոխուի կղզիի գրաւեալ բաժինի վարչակարգի որոշումը, աւելցուց ան, այսօր կղզիի հիւսիսը գտնուող յոյն-կիպրացիներուն պիտի ուղարկուի միայն դեղօրայք, որ բացառուած է այսպէս-կոչուած հարկերու վճարումէն։

Անդրադառնալով կղզիի գրաւեալ բաժնի վարչակարգի որոշումին, պարոն Կասուլիտիս ակնարկեց խնդրոյ առարկայ յոյն-կիպրացիներու հանդէպ անմարդկային վերաբերմունքին։ Ջախջախիչ մեծամասնութիւնը, յայտնեց ան, տարեցներ են եւ չեն կրնար նոյնիսկ երթալ մատակարարման կեդրոն, ստանալու այդ օժանդակութիւնը, որու իբրեւ հետեւանք, մինչեւ օրս, Միացեալ Ազգերը այս օգնութիւնը կը յանձնէ իրենց դրան առջեւ։ Պարոն Կասուլիտիս ըսաւ, թէ այս հարցին մօտէն պիտի հետեւի եւ հարցը պիտի դրուի Եւրոպական Խորհուրդի Նախարարաց Յանձնախումբի օրակարգին վրայ։

Ի վերջոյ, կէսօրուայ շուրջ, միայն դեղօրայք անցաւ կղզիի գրաւեալ բաժինը, քանի որ կղզիի հիւսիսի վարչակարգը իր որոշումը որեւէ ձեւով փոփոխութեան չենթարկեց։

Դեղօրայքը անցաւ փոքր բեռնատար ինքնաշարժով, որ ստուգուեցաւ թուրք-կիպրացիներու կողմէ, Լիտրա Փալասի անցակէտէն անցած ժամանակ։

Մարդասիրական հարցերու Յանձնակատար Ֆոտիս Ֆոտիու վստահեցուց, որ դեղօրայքը ուղարկուեցաւ դէպի Րիզօկարպասօ։

Աւելցնել Ձեր մեկնաբանութիւնները