Հայոց Ցեղասպանութեան ճանաչման դէմ ծաւալած իր գործունէութեամբ եւ հակահայ տրամադրութիւններով յայտնի թրքական «ASİMDER» միութեան նախագահ Կէոքսել Կիւլպէյը անդրադարձած է Թուրքիոյ մէջ բնակող ծպտեալ հայերու հարցին:

«Էրմենիհապեր»-ի փոխանցմամբ, Կիւլպէյը նշած է, որ «հայերու տեղահանութեան» այսինքն` Հայոց Ցեղասպանութեան ժամանակ իրենց տուներէն հեռանալ չցանկացող հայերը քօղարկուած են քիւրտերու, ալեւիներու, թուրքերու անուան տակ եւ այսօր ծպտեալ հայերը Թուրքիոյ մէջ մեծ թիւ կը կազմեն: Թուրք գործիչը յիշեցուցած է նաեւ Պոլսոյ հայոց պատրիարքի նախկին փոխանորդ Արամ Աթէշեանի այն յայտարարութիւնը, թէ Թունջելիի բնակչութեան 90 տոկոսը հայեր են: «ASİMDER»-ի նախագահի խօսքով` տարբեր ուսումնասիրութիւններու եւ հաշուարկներու համաձայն` Թուրքիոյ մէջ այժմ ընդհանուր առմամբ կ՛ապրի 37․055 ծպտեալ հայ ընտանիք:

«Այսպէս, Տիարպեքիրի, Մալաթիոյ, Թունջելիի, Երզնկայի, Սեբաստիոյ, Կեսարիոյ, Վանի, Շանլըուրֆայի, Մարտինի եւ Ատանայի մէջ կան հայ ընտանիքներ, որոնք քօղարկուած են իբրեւ թուրք, քիւրտ, ասորի կամ ալեւի», յայտարարած է Կիւլպէյը: Հայատեաց գործիչին պնդումով` մեծ թիւով հայեր կան Թուրքիոյ քրտամէտ ընդդիմադիր Ժողովուրդներու ժողովրդավարական HDP կուսկացութեան  եւ Թուրքիոյ մէջ ահաբեկչական խմբաւորում համարուող «Քիւրտիստանի բանուորական» PKK կուսակցութեան կազմին մէջ: Կիւլպէյ նշած է նաեւ, որ իրենք ամենայն ուշադրութեամբ կը հետեւին ծպտեալ հայերուն եւ կը ցանկան, որ պետական կառոյցները համապատասխան միջոցներ ձեռք առնեն` զանոնք բացայայտելու ու վերահսկելու համար:

Աւելցնել Ձեր մեկնաբանութիւնները