Երէկ, Միացեալ Ազգերու մօտ՝ Կիպրոսի Մնայուն Ներկայացուցիչ, Դեսպան Քորնիլիոս Քորնիլիու մատնանշեց, թէ միջազգային խաղաղութիւնն ու անվտանգութիւնը Կիպրոսի Հանրապետութեան արտաքին քաղաքականութեան առաջնակարգ նպատակներն են, նշելով թէ Կիպրոս ստորագրած եւ վաւերացուցած է ապազինումի գլխաւոր՝ բոլոր պայմանագիրները։

Ելոյթ ունենալով ՄԱԿ-ի Առաջին Յանձնախումբի ընդհանուր զրոյցի ծիրէն ներս, որ կը զբաղի գլխաւորաբար  ապազինման եւ միջազգային անվտանգութեան հարցերով, պարոն Քորնիլիու յայտնեց, թէ 2002-ին, Կիպրոսի Հանրապտութիւնը ստորագրեց Հրդիրներու տարածման դէմ կնքուած Միջազգային Պայմանագիրը, իսկ 2005-էն ի վեր կը մասնակցի Անվտանգութեան Տարածման Նախաձեռնութեան։

Մամլոյ եւ Տեղեկատուական Գրասենեակի յայտարարութեան համաձայն, պարոն Քորնիլիու աւելցուց, թէ 2015-ի Մայիսին, Կիպրոս, Միացեալ Նահանգներու հետ միասին կազմակերպեց երկխօսութեան յաջող դրսեւորում մը, Տարածման դէմ կատարուող Նախաձեռնութեան ծիրէն ներս, փորձ մը կատարելով, յառաջ քշելու տարածաշրջանային գործակցութիւնը։

Պարոն Քորնիլիու տեղեկացուց Յանձնախումբը, Կիպրոսի՝ Զէնքի Վաճառման Դաշինքի Վարիչ Յանձնախումբի իբրեւ անդամ՝ ընտրութեան համար եւ յիշեցուց, որ Կիպրոս, ինչպէս այլ պետութիւններ, դիմում կատարած է երկու տասնամեակէ աւելի, մասնակցելու Ապազինումի Համաժողովին։

Եզրափակելով, պարոն Քորնիլիու ըսաւ, թէ Կիպրոսի՝ ապազինման նկատմամբ յանձնառութիւնը համապատասխան է, Արեւելեան Միջերկրականի եւ Միջին Արեւելքի տարածաշրջանին մէջ թափուող՝ Հաւաքական Կործանումի Զէնքերու սահմանափակումի ջանքերուն։

Աւելցնել Ձեր մեկնաբանութիւնները