Ազգային ժողովին մէջ լրագրողներու հետ զրոյցի մը ընթացքին Ազգային ժողովի ՀՅԴ խմբակցութեան քարտուղար Աղուան Վարդանեան նշեց, թէ ուրախ է, որ Ակրամունթը ի վերջոյ չդիմացաւ ճնշումներուն եւ հրաժարական տուաւ: Վարդանեանի կարծիքով` ով ալ ըլլայ Եւրոպական Խորհուրդի Խորհրդարանական Վեհաժողովի յաջորդ նախագահը, բնականաբար, հետեւութիւններ պիտի կատարէ:

«Ասիկա մէկ օրուան պատմութիւն չէ: Ազրպէյճանը բաւական լուրջ ճնշումներու տակ է», ըսաւ ան եւ աւելցուց. «Ի՛նչ պիտի ընէ Ազրպէյճանը` իր խնդիրն է. դուրս կու գայ Վեհաժողովէն, թէ ոչ, մեր հարցը չէ: Մենք այդ կառոյցներուն անդամ ենք, մենք պարտաւոր ենք կատարել մեր պարտականութիւնները: Մենք պէտք է կարենանք մեր պատկերացուցած արժէքային համակարգին մօտ ըլլալ: Այս հրաժարականէն ետք հետեւութիւններ պիտի կատարեն եւրոպական տասնեակ ու տասնեակ օրէնսդիրներ», յայտարարեց ան:

Լրագրողները հետաքրքրուեցան` 2018-ին նախագահ Սերժ Սարգսեանի` վարչապետ առաջադրման հարցով:

«Միշտ խուսափած եմ «եթէ»-ներով հարցումներուն պատասխանելէ, ատիկա անլուրջ է: Կայ օրէնսդրութիւն, կայ Հանրապետական կուսակցութիւն, որուն, ըստ մեր համաձայնագիրին, կը պատկանի վարչապետի թեկնածու առաջադրելու իրաւունքը, եւ երբ այդ իրաւունքը կիրարկուի, մենք այդ մասին կը խօսինք: Հիմա այդ մասին խօսիլը ժամանակավրէպ է», նշեց ան: Աղուան Վարդանեան խորհուրդ տուաւ համբերատար ըլլալ` նշելով, որ կու գայ ժամանակը, երբ բոլոր հարցումներուն պատասխանները կը յստականան:

Աւելցնել Ձեր մեկնաբանութիւնները