Երէկ երեկոյեան, K-Cineplex Նիկոսիոյ շարժապատկերի սրահին մէջ, 300-է աւելի հանդիսատեսներու ներկայութեան, տեղի ունեցաւ հօլիվուտեան «Խոստումը» ֆիլմի՝ Կիպրոսի avant premiere-ը, կազմակերպութեամբ Հայ Համայնքի Պետական Ներկայացուցիչի գրասենեակին եւ Կիպրոսի Հայ Դատի Յանձնախումբին։

Ֆիլմի ցուցադրութենէն առաջ, տեղի ունեցաւ ընդունելութիւն, K-Cineplex-ի ցուցասրահի մուտքին։ Ներկայ էին Խորհրդարանի նախագահ Տիմիթրիս Սիլլուրիս, Կաթողիկոսական Փոխանորդ Տէր Խորէն Արքեպիսկոպոս Տողրամաճեան, Հայ Համայնքի Պետական Ներկայացուցիչ Վարդգէս Մահտեսեան, ինչպէս նաեւ բազմաթիւ երեսփոխաններ, կուսակցութիւններու ղեկավարներ, դեսպաններ, բարձրաստիճան կառավարական պաշտօնակատարներ, մամլոյ եւ տեղեկատուական միջոցներու, ինչպէս նաեւ համայնքային կառոյցներու եւ կազմակերպութիւններու ներկայացուցիչներ։

Ողջոյնի խօսք փոխանցեց Կիպրոսի Հայ Դատի Յանձնախումբի անդամ Վարդենի Գասապեան, ինչպէս նաեւ՝ ՀՅԴ Կիպրոսի Կոմիտէի Ներկայացուցիչ Սիմոն Այնէճեան։

The Promise Avant Premiere

Ներկաներուն իր խօսքը ուղղեց նաեւ Փոքրամասնութիւններու Նախագահական Յանձնակատար Ֆոտիս Ֆոտիու, որ փոխանցեց Հանրապետութեան նախագահ Նիկոս Անաստասիատիսի ջերմ ողջոյնները, որ սոյն ձեռնարկին տրամադրած էր իր բարձր հովանաւորութիւնը։

2 ժամ տեւող՝ իսկապէս տպաւորիչ եւ սքանչելի դերասանութեամբ պատրաստուած ֆիլմը աննախընթաց տպաւորութիւն թողեց ներկաներուն վրայ։ «Խոստումը» ֆիլմը պիտի ցուցադրուի կղզիի տարածքին գտնուող՝ բոլոր K-Cineplex ցուցասրահներուն մէջ, յաջորդ շաբաթներու ընթացքին։

Աւելցնել Ձեր մեկնաբանութիւնները