Կիպրոսի Հանրապետութեան կառավարութիւնը կ՛ընդգծէ, թէ չի ճանչնար Գաթալունիայի անկախութեան համար կատարուած՝ միակողմանի հռջակումը, որ երէկ ստորագրուեցաւ Գաթալունիայի շրջանային կառավարութեան նախագահին կողմէ, այսպէս՝ խախտելով Սպանիոյ Սահմանադրութիւնը։

Կիպրոսի Հանրապետութեան նախագահութեան տարածած յայտարարութեան մէջ կը վերահաստատուի, թէ Կիպրոս բուռն կերպով կը կրկնէ իր անաչառ աջակցութիւնը, Սպանիոյ հողային ամբողջականութեան եւ գերիշխանութեան նկատմամբ։

Յայտարարութեան մէջ կը նշուի նաեւ, թէ այս ներքին հարցին մէջ, Կիպրոս կը շեշտէ թէ ամենաիմաստուն քայլը պիտի ըլլար, որ տագնապի լուծումը հետապնդուէր երկխօսութեան միջոցաւ, խաղաղ եւ հանդարտ ձեւով, լրիւ համակերպելով Սպանիոյ Սահմանադրութեան։

Մինչ այդ, ըստ վերջին իրադարձութեան, պաշտօնական Մատրիտ չեղեալ կը հռջակէ Գաթալունիայի ինքնավարութիւնը եւ Սպանիոյ կեդրոնական կառավարութիւնը կը ստանձնէ տարածաշրջանի հակակշիռը։

Այս մէկը յայտարարեց Սպանիոյ վարչապետ Մարիանօ Ռահոյ, Նախարարաց Խորհուրդի նիստի աւարտին։ Ան ըսաւ, թէ ի գործ դրուած է սպանական սահմանադրութեան յատուկ յօդուած մը, որ կ՛արտօնէ սպանական կառավարութեան, որ կանխէ Գաթալունիայի ինքնավար վարչակաչգը, կազմալուծէ տեղական իշխանութիւնները եւ վերահաստատէ սահմանադրական կարգը, եթէ հարկ ըլլայ նաեւ՝ բռնի ուժով։

Աւելցնել Ձեր մեկնաբանութիւնները