Այս առաւօտ, Սփիւռքի նախարար Հրանուշ Յակոբեան հանդիպեցաւ Սփիւռքի հարցերու Նախագահական Յանձնակատար Ֆոտիս Ֆոտիուի հետ, ներկայութեամբ հայ համայնքի պետական ներկայացուցիչ Վարդգէս Մահտեսեանի։

Կիպրոս եւ Հայաստան, երկու երկիրներու սփիւռքի մարզէն ներս գործակցութեան համաձայնագիր ստորագրելէ ետք, այսօրուայ հանդիպումին զրոյցի առարկայ դարձան հետապնդուելիք գործնական քայլերը։

Fotiou-Hagopian-Syllouris-Mahdessian

Ապա, Սփիւռքի նախարարը յաջորդական հանդիպումներ ունեցաւ Կիպրոսի Յոյն Ուղղափառ եկեղեցւոյ պետ Խրիսոստոմոս Արքեպիսկոպոսին եւ Խորհրդարանի նախագահ Տիմիթրիս Սիլլուրիսի հետ, որմէ ետք ան ուղղուեցաւ Նախագահական Պալատ, ուր եռակողմանի աշխատանքային հանդիպում ունեցաւ Հայաստան-Կիպրոս-Յունաստան եռանկիւնը ներկայացնող պաշտօնակատարներուն հետ։ Յունաստանի պատուիրակութիւնը կը գլխաւորէր Արտաքին Գործոց Ենթանախարար Թերընս Քուիք։ Հանդիպումի ընթացքին որոշումներ առնուեցան երեք երկիրներու սփիւռքի կազմակերպութիւններու ամրապնդման եւ երեք երկիրներու՝ այս մարզէն ներս սերտ գործակցութեան ուղղութեամբ։

Հանդիպումէն ետք, տեղի ունեցաւ մամլոյ ասուլիս, ուր լրագրողներուն ներկայացուեցան հանդիպումի արդիւնքները։

Ապա, երեք երկիրներու ներկայացուցիչները ուղղուեցան Մաքէտոնիթիսսայի զինուորական դամաբարանը, ուր ծաղկեպսակներ զետեղեցին յուշահամալիրին առջեւ։

Տեղական մամուլը եւ հեռուստատեսութեան կայանները լայն կերպով անդրադարձան տեղի ունեցած հանդիպումներուն։

Fotiou-Hagopian

Աւելցնել Ձեր մեկնաբանութիւնները