Ներկայացուցիչներու Տան նախագահ Տիմիթրիս Սիլլուրիս յայտարարեց, որ Կիպրոսի եւ Հայաստանի պայքարը հասարակաց է, ընդդէմ օտար յարձակողապաշտութեան եւ բռնագաղթի քաղաքականութեան:

Ներկայացուցիչներու Տան նախագահը երէկ հանդիպում ունեցաւ Հայաստանի Սփիւռքի նախարար Հրանուշ Յակոբեանի հետ, որ մարդասիրական հարցերու գծով նախագահութեան ենթանախարար Ֆոտիս Ֆոտիուի հրաւէրով պաշտօնական այցելութեամբ Կիպրոս կը գտնուի:

Պաշտօնական հաղորդագրութեան համաձայն, Սիլլուրիս վերահաստատեց խորհրդարանին զօրակցութիւնը Հայաստանին ու անոր ժողովուրդին, իսկ հանդիպումի ընթացքին վերահաստատուեցան Կիպրոսի եւ Հայաստանի միջեւ պատմական եւ մշակութային զօրաւոր կապերը, որոնք ժամանակ առ ժամանակ կ՛արտայայտուին եղբայրական սերտ համագործակցութեամբ եւ զօրակցութեամբ, ոչ միայն կառավարական ու խորհրդարանական մակարդակով, այլեւ երկու ժողովուրդներուն մակարդակով:
Տկն. Յակոբեան շնորհաւորեց Ներկայացուցիչներու Տունը, Ստելլա Կիրիակիտուի՝ Եւրոպայի Խորհուրդի Խորհրդարանական Վեհաժողովի նախագահ ընտրութեան առթիւ, յիշեցնելով, որ իր երկիրը յարատեւ կերպով կը զօրակցի Կիպրոսին, միջազգային ատեաններու մէջ անոր վերաբերող բոլոր հարցերուն մէջ:
Հայ նախարարուհին շնորհակալութիւն յայտնեց Ներկայացուցիչներու Տան որոշումներուն եւ զօրակցութեան համար: Ան յատկապէս անդրադարձաւ Կիպրոսի հայկական վարժարաններուն եւ հայ համայնքի վայելած պետական օժանդակութեան՝ կրթական ու մշակութային ոլորտներուն մէջ:

Աւելցնել Ձեր մեկնաբանութիւնները