Չորեքշաբթի, 18 Հոկտեմբեր 2017-ին, Պրիւքսելի Հայ տան մէջ ընթացք առաւ Եւրոպահայութեան 4-րդ համագումարը, որուն առաջին օրուան սկիզբը ողջոյնի խօսքեր արտասանեցին Եւրոպայի Հայ դատի յանձնախումբի նախագահ Գասպար Կարապետեան, Արցախի Հանրապետութեան նախագահ Բակօ Սահակեան, Արամ Ա. կաթողիկոս, Հայաստանի Հանրապետութեան սփիւռքի նախարար Հրանուշ Յակոբեան եւ ՀՅԴ Հայ դատի Կեդրոնական խորհուրդի նախագահ Յակոբ Տէր Խաչատուրեան:

Առաջին օրուայ ընթացքին քննարկուեցան հետեւեալ երեք հարցերը.

«Հայապահպանում` գոյատեւման հիմնական ազդակ» խորագիրով առաջին կլոր սեղանին զրուցավարն էր Համազգային կրթական եւ մշակութային միութեան Կեդրոնական վարչութեան ատենապետ Մկրտիչ Մկրտիչեանը:

Երկրորդը կը կրէր «Թուրքեւազրպէյճանական լոպին Եւրոպայի մէջ» խորագիրը եւ անոր զրուցավարն էր ՀՅԴ Եւրոպայի Հայ դատի գրասենեակի եւրոպական հարցերու պատասխանատու Հեղինէ Էվինեանը

Օրուան վերջին կլոր սեղանին, որ կը կրէր «Ցեղասպանութեան ճանաչում եւ հատուցումներ» խորագիրը, զրուցավարն էր Արդարութեան եւ մարդկային իրաւանց հայկական իրաւաբանական կեդրոնի տնօրէններու խորհուրդի անդամ Գէորգ Յակոբճեանը:

Հինգշաբթի, 19 Հոկտեմբեր 2017-ին, Եւրոպական խորհրդարանին մէջ տեղի ունեցաւ Եւրոպահայութեան 4-րդ համագումարի 2-րդ նիստը: Բացման նիստին անգլերէնով խօսքեր արտասանեցին ՀՅԴ Եւրոպայի Հայ դատի յանձնախումբի նախագահ Գասպար Կարապետեան, Հայաստանի Հանրապետութեան արտաքին գործոց նախարար Էդուարդ Նալբանդեան, Մեծի Տանն Կիլիկիոյ Արամ Ա. կաթողիկոս, Եւրոպական խորհրդարանի անդամներ Մարիա Սփիրակի, Ֆրանք Էնկել եւ Էլենի Թէոխարուս, ինչպէս նաեւ ՀՅԴ Հայ դատի Կեդրոնական խորհուրդի նախագահ Յակոբ Տէր Խաչատուրեան:

Առաջին կլոր սեղանին նիւթն էր «Հայկական Ցեղասպանութեան Ճանաչումը – Հանգրուաններ եւ Մարտահրաւէրներ», որուն մաս առին ցեղասպանագէտ Փրոֆ. Եայիր Օրոն եւ Հայկական Իրաւաբանական Կեդրոնի նախագահ Քեն Խաչիկեան, զեկուցավարութեամբ ՀՅԴ Բիւրոյի անդամ Կիրօ Մանոյեանի:

Երկրորդ կլոր սեղանը քննարկեց «Հարաւային Կովկաս – Իրագործումներ եւ հեռանկարներ»արաւային Կովկաս —  նիւթը մասնակցութեամբ դեսպան Թաթուլ Մարգարեանի, ԵՄ արտաքին գործերու սպասարկութեան Հայաստանի բաժնի պատասխանատու Ճիովաննի Քրեմոնինիի, Տոկտ. Հապիլ Անտրէյ Ժեպայի եւ «Հալօ Թրասթ»ի տարածաշրջանային տնօրէն Աշ Պոտիի, զեկուցավարութեամբ ՀՅԴ Հայ դատի Կեդրոնական խորհուրդի նախագահ Յակոբ Տէր Խաչատուրեանի:

Երկօրեայ համագումարի աւարտին ՀՅԴ Եւրոպայի Հայ դատի յանձնախումբի նախագահ Գասպար Կարապետեան շնորհակալութիւն յայտնեց Եւրոպական խորհրդարանի անդամներ Մարիա Սփիրակիին, Ֆրանք Էնկելին եւ Էլէնի Թէոխարուսին, որոնք օժանդակած էին համագումարի կազմակերպման: Ան շնորհակալութիւն յայտնեց զեկուցաբերներուն, ինչպէս նաեւ Եւրոպայի Հայ դատի գրասենեակի անձնակազմին ու ՀՅԴ Պելճիքայի Հայ դատի յանձնախումբին` ընդգծելով, որ Եւրոպայի հայերը միասնաբար պիտի պայքարին մեր դատերու արդար լուծման համար:

Աւելցնել Ձեր մեկնաբանութիւնները