Սփիւռքի նախարար Հրանուշ Յակոբեանի Կիպրոսի մէջ ունեցած հանդիպումներու ընթացքին կնքուած համաձայնութեան մասին, հայ համայնքի պետական ներկայացուցիչ Վարդգէս Մահտեսեան նախ եւ առաջ տեղեկացուց նախարար Յակոբեանի եւ Սփիւռքի հարցերու Կիպրոսի նախագահական յանձնակատար Ֆոթիս Ֆոթիուի միջեւ տեղի ունեցած հանդիպման մասին, որուն ինք եւս ներկայ եղած է: Հանդիպումին քննարկուած են Կիպրոսի եւ Հայաստանի սփիւռքներու միջեւ գործակցութեան մարզին մէջ համաձայնագիրի իրագործման գործնական քայլերու հետապնդման ձեւերը:

Վարդգէս Մահտեսեան ըսաւ, որ նշեալ համաձայնագիրով երեք երկիրները պիտի նպաստեն ակադեմական հիմնարկներու, մշակութային կեդրոններու, լրատուական խումբերու եւ գիտական կեդրոններու միջեւ միացեալ տեղեկատուական փոխանակման նախաձեռնութիւններու եւ նախագիծերու խթանման:

Մահտեսեան շեշտեց, որ համաձայնագիրի գործադրութեան կարեւորութիւնը ի շահ երեք երկիրներուն պիտի ըլլայ` մշակութային, տնտեսական, յարաբերական, ժողովուրդներու միջեւ կապերու սերտացման եւ կրօնական մակարդակներուն վրայ` աւելցնելով, որ երեք երկիրներու սփիւռքներու կազմակերպութիւններուն միջեւ կապերու սերտացումը նոյնպէս պէտք է մեր օրակարգին վրայ ըլլայ` գործնականացնելու համար համաձայնագիրին կէտերը:

Աւելցնել Ձեր մեկնաբանութիւնները