Լիբանանի վարչապետ Սաատ Հարիրի, որ երէկ երեկոյեան Կիպրոս ժամանեց պաշտօնական այցելութեամբ, վստահեցուց որ իր երկիրը կառչած կը մնայ Կիպրոսի Հանրապետութեան տարածային ամբողջականութեան եւ գերիշխանութեան։

Բազմիցս, յայտնեց ան, կոչ ուղղած ենք, որ Ապահովութեան Խորհուրդի որոշումները լրիւ գործադրուին։ Զօրավիգ կանգնած ենք Միացեալ Ազգերու բարի ծառայութիւններու առաքելութեան եւ քաջալերած ենք կիպրական հարցի խաղաղ լուծման համար թափուող ջանքերու սաստկացումը։
Պարոն Հարիրի բացառիկ համարեց նախագահ Անաստասիատիսի հետ ունեցած իր հանդիպումը, աւելցնելով որ ան շեշտեց անհրաժեշտութիւնը, երկու երկիրներուն միջեւ տնտեսական եւ առեւտրական գործակցութեան յաւելեալ ամրապնդման։

Երէկ երեկոյեան, նախագահ Անաստասիատիս, Լիբանանի վարչապետ Սաատ Հարիրի-ի հետ ունեցած տեսակցութենէն ետք յայտնեց, թէ Թուրքիոյ յամառ կեցուածքը, Կիպրոսի նկատմամբ պահելու երաշխիքային իրաւունքներ եւ գետնի վրայ՝ զինուած ուժեր, թոյլ չտուաւ որ Քրան Մոնթանայի մէջ յանգինք դրական արդիւնքի։

Ան վերահաստատեց նաեւ, թէ յոյն-կիպրական կողմը կառչած կը մնայ բանակցութիւններու շարունակութեան գաղափարին, նպատակ ունենալով յանգելու կիպրական հարցի ընդհանրական լուծումի, Միացեալ Ազգերու չափանիշներու շրջագիծէն ներս։

Անդրադառնալով Կիպրոսի Հանրապետութիւն-Լիբանան երկ-կողմանի յարաբերութիւններուն, նախագահ Անաստասիատիս ըսաւ, թէ զրոյցի առարկայ դարձան անոնց ամրապնդման եւ գօտեպնդման համար միջոցներ, շարք մը մարզերէ ներս, ինչպէս առեւտուրը, ուժանիւթը, կրթութիւնը եւ զբօսաշրջութինը։

Անոնք զրուցեցին նաեւ շրջանային մակարդակի վրայ գործակցութեան մասին եւ նախագահ Անաստասիատիս ըսաւ, թէ պաշտօնական Նիկոսիան կը մտադրէ շուտով հիւրասիրել Կիպրոս-Յունաստան-Լիբանան՝ եռակողմանի վեհաժողով մը, մինչ ան յայտարարեց նաեւ Լիբանանի զինուած ուժերուն ուղղուած զինուորական օժանդակութեան նոր փաթեթ մը, ահաբեկչութեան դիմագրաւման ջանքերու ամրապնդման համար։

Աւելցնել Ձեր մեկնաբանութիւնները