Հանրապետութեան նախագահութեան թեկնածու, ՏԻԿՕ-ի նախագահ Նիկոլաս Պապատոպուլոս, Գաթալունիայի հարցով արտայայտեց իր յոյսը, թէ ա՛յն սկզբունքը, որ անջատողական շարժումներ չեն ճանչցուիր, պիտի գործադրուի նաեւ Կիպրոսի մէջ։ Եւ ճիշդ այս պատճառով, շեշտեց ան, մենք այս հարցով պէտք է սկզբունքային դիրք պահենք։ Պարոն Պապատոպուլոս յայտնեց նաեւ, թէ Գաթալունիայի մէջ պատահող դէպքերը կþազդեն համայն Եւրոպական Միութեան։ Միաժամանակ, ան մաղթեց որ Սպանիա կարենայ յաղթահարել տագնապը առանց բախումներու եւ սպանացի ժողովուրդը կարենայ գտնել իր լուծումները օրինականութեան եւ սահմանադրականութեան սահմաններէն ներս։

Միւս կողմէ, նախագահութեան թեկնածու, Քաղաքացիներու Դաշինքի նախագահ Եորղոս Լիլլիքաս մատնանշեց, որ պէտք է ուշադրութիւն ընենք Գաթալունիայի մէջ ստեղծուած հակումէն։ Ան արտայայտեց ա՛յն համոզումը, թէ Եւրոպական Միութիւնը պիտի չընդունի եւ պիտի չճանչնայ որեւէ անջատողական շարժում։ Ան մատնանշեց սակայն, թէ այս մէկը պէտք չէ հանգստացնէ մեզի, որովհետեւ կը ստեղծուի կլիմայ մը, միջավայր մը եւ հակում մը։ Պէտք է, շեշտեց պարոն Լիլլիքաս, որ անպայման մեզի զբաղեցնէ այս հարցը, աւելցնելով որ ակնկալելի է, որ թուրք-կիպրական ղեկավարութիւնը եւ հաւանաբար՝ Թուրքիան փորձէ օգտուիլ այս հարցէն։

Աւելցնել Ձեր մեկնաբանութիւնները