Ամառուան երկար դադարէ մը ետք, որու ընթացքին հիմնական վերանորոգման ենթարկուեցաւ մեր ակումբը, Նոյեմբեր 15-ին տեղի ունեցաւ  Համազգայինի 2017-18 տարեշրջանի Բ. Մշակութային Երեկոն, որ իր յայտագրի ճոխութեամբ խանդավառեց ներկաները, որոնց թիւը այս առիթով հասած էր 60-ի, մրցանիշ՝ Համազգայինի Մշակութային Երեկոյի համար: Ա. երեկոն տեղի ունեցած էր Յունիսի 17-ին, 53 հոգիի ներկայութեամբ:

Hrair Yessayan

 

Վարչութեան ատենապետի բացման խօսքէն ետք երիտասարդ մտաւորական եւ ուսուցիչ Հրայր Եսայեան խօսեցաւ համաշխարհային պատմութեան հոլովոյթին մէջ մշակոյթի կարեւոր դերակատարութեան մասին, յատկապէս անդրադառնալով հայ ժողովուրդին : Իր խօսքի վերջաւորութեան ան անդրադարձաւ նաեւ Համազգայինի առաքելութեան եւ այդ կապակցութեամբ տարուող աշխատանքներուն:

Ապա ցուցադրուեցաւ Համազգայինի մասին տեսերիզ մը, որ գեղեցկօրէն կը ներկայացնէր Համազգայինի աշխարհասփիւռ աշխատանքները, իր դպրոցներուն, կեդրոններուն, հրատարակչականին եւ անհամար արուեստի խումբերուն ընդմէջէն:

Aro Tavitian

Յայտագրի յաջորդ բաժինով՝ «Ամսուան Գիրքը», Արթօ Դաւիթեան համառօտ կերպով ներկայացուց Պերճուհի Բարսեղեանի «Խանձուած Օրեր» գիրքը: Բացատրութիւններ տրուեցան հեղինակի կեանքի ոդիսականին եւ գիրքի պարունակութեան մասին ու յայտարարուեցաւ, որ այս հրաշալի գիրքէն օրինակներ տրամադրելի են գնել փափաքողներուն համար:

Nara - Alisa

Յայտագրի վերջին բաժինով ելոյթ ունեցան Նառա Սարդարեանի (դաշմակ) եւ Ալիսա Ոսկանեանի (քանոն), որոնց երաժշտական գեղեցիկ կատարումը մեծապէս գնահատուեցաւ ներկաներուն կողմէ: Անոնք ներկայացուցին «Էրզրումի Շորոր» եւ «Տրապիզոնցիների Պար» կտորները, բուռն ծափեր խլելով հանդիսատեսներէն:

Երեկոն փակուեցաւ գինիի եւ թեթեւ ուտելիքի աւանդական հիւրասիրութեամբ, որու ընթացքին ծախուեցան նաեւ ամսուան գիրքէն օրինակներ:

Աւելցնել Ձեր մեկնաբանութիւնները