Արտաքին Գործոց նախարար Իոաննիս Կասուլիտիս, Ռատիօկայանի Երրորդ Յայտագրէն ելոյթ ունենալով, յայտնեց թէ կառավարութեան տեսլականն է ընդլայնուած տարածաշրջանային գործակցութեան բազմակողմանի մարմնի մը կազմաւորումն ու համադրումը, արաբական երկիրներու, Իսրայէլի եւ Եւրոպական Միութեան միջերկրականեան երկիրներու մասնակցութեամբ։

Ան յայտնեց թէ պաշտօնական Նիկոսիոյ նպատակն է այս գործընթացին մէջ ըլլալ առաջնակարգ դերակատար, ինչպէս նաեւ շաղկապող օղակ։

Անդրադառնալով Կիպրոսի Հանրապետութիւն-Յունաստան-Եգիպտոս Եռակողմանի հինգերորդ Վեհաժողովի արդիւնքներուն, պարոն Կասուլիտիս ըսաւ, թէ այս գործակցութեան հիմնական առանձքը կը հանդիսանայ Արեւելեան Միջերկրականի ընդհանուր տարածաշրջանի անվտանգութիւնն ու կայունութիւնը։

Մասնաւորաբար, ուժանիւթի հարցերու կապակցութեամբ, արտաքին գործոց նախարարը յայտնեց, թէ գոյութիւն ունին արդէն իսկ նախաձեռնուած՝ զուգահեռ գործընթացներ, Լիբանանի եւ Իտալիոյ հետ եռակողմանի գործակցութիւններու համար։ Ան յայտնեց, թէ շուտով պիտի իրականանայ քառակողմանի հանդիպում, Կիպրոսի, Յունաստանի, Իտալիոյ եւ Եգիպտոսի նախարարներուն միջեւ, East-Med Highlight անունը կրող՝ ծրագրուած ենթակառոյցին համար։

Անգարա-Թել-Ավիվ խորհրդակցութիւններուն կապակցութեամբ, ստեղծելու բնական կազի խողովակաշար մը, իսրայէլեան «Լէվիաթան» տարածքէն, որ պիտի ճեղքէ Թուրքիան, ուղղուող ճամբուն վրայ, Իոաննիս Կասուլիտիս ըսաւ, թէ տակաւին չի կրնար նախատեսուիլ, թէ այս խորհրդակցութիւնները որոշ արդիւնք պիտի տա՞ն, թէ ոչ։ Ան շեշտեց սակայն, թէ առանց կիպրական հարցի լուծումին, այդպիսի գործակցութիւն գոյութիւն չի կրնար ունենալ, ուր կը ներառուի նաեւ Կիպրոսը։

Աւելցնել Ձեր մեկնաբանութիւնները