Կ՛ակնկալուի թէ յառաջիկայ շաբթուայ սկիզբը, Միացեալ Ազգերու Կազմակերպութեան Ընդհանուր Քարտուղար Անթօնիօ Կութերեշ պիտի ներկայացնէ տեղեկագիր, Կիպրոսի մէջ՝ խաղաղապահ ուժերու ռազմավարական վերատեսութեան նկատմամբ։

Վկայակոչելով դիւանագիտական տեղեկութիւններ, Ռատիօկայանի՝ Նիւ Եորքի թղթակից Ապոստոլիս Զուպանիոտիս հաղորդեց, թէ «Ունֆիկիպ»-ի գործունէութեան պայմանները որեւէ փոփոխութեան պիտի չենթարկուին, քանի որ իրենց օգտակարութիւնը, կղզիին վրայ խաղաղութեան եւ կայունութեան պահպանման ծիրէն ներս, կը մնայ անտարակոյս։

Գոյութիւն պիտի ունենայ առաջարկ, խաղաղապահ ուժերու անձնակազմի թիւը փոքր կրճատումի ենթարկելու ուղղութեամբ, ինչպէս նաեւ սահմանափակելու անոր ծախսերուն համար  նախատեսուած տարեկան գումարը։

Տեղեկագիրը հիմնուած է Նոյեմբերի սկիզբը, Կիպրոս այցելած, մասնագէտներու խմբակի կատարած առաջարկներուն վրայ։ ՄԱԿ-ի ընդհանուր քարտուղարի՝ Կիպրոսի յատուկ ներկայացուցիչ Էլիզապէթ Շպէհըրի գլխաւորած խմբակը տեղւոյն վրայ քննեց կղզիին վրայ տիրող ներկայ իրավիճակը եւ հանդիպեցաւ նաեւ կղզիի երկու համայնքներու ղեկավարներուն հետ։

Տեղեկագիրը ներկայացնելու համար, իբրեւ պայմանաժամ ճշդուած է երկուշաբթի Նոյեմբեր 27-ն։ Չի բացառուիր սակայն, որ տեղի ունենայ մէկ կամ երկու օրուայ յապաղում մը։

Աւելցնել Ձեր մեկնաբանութիւնները