Ընտրութիւններու Սպասարկութեան տնօրէն Տիմիթրիս Տիմիթրիու յայտարարեց, որ 40 հազար նոր ընտրողներէն միայն 2 հազար 800-ը ցարդ արձանագրուած են ընտրական ցանկերուն վրայ:

Հարցումին, թէ արդեօք վերջին օրերու քարոզչական արշաւը որեւէ ազդեցութիւն ունեցա՞ծ է, Տիմիթրիու պատասխանեց ըսելով, որ արդիւնքը յայտնի պիտի ըլլայ մինչեւ Դեկտեմբեր 18, որ արձանագրութեան վերջին ժամկէտն է: Աւանդաբար, կիպրացիները ամէն ինչ վերջին վայրկեանին կը ձգեն, ըսաւ ան, նշելով որ հետաքրքրութեան աշխուժացում կ՛ակնկալուի վերջին 10 օրերուն:

Այլ հարցումի մը պատասխանելով Տիմիթրիու ըսաւ, որ նախագահական ընտրութիւններու պարագային իւրաքանչիւր թեկնածու կրնայ մինչեւ մէկ միլիոն եւրօ յատկացնել ընտրապայքարի ծախսերու համար: Ընտրութիւններու արդիւնքներու յայտարարութենէն երկու ամիս յետոյ, աւելցուց ան, պէտք է Ընտրութիւններու Սպասարկութեան ներկայացուին ծախսերու հաշիւները, որոնք ստուգման համար կը փոխանցուին Ընդհանուր Վերահսկիչին:

Աւելցնել Ձեր մեկնաբանութիւնները