Նիկոսիա — Չորեքշաբթի 31 Յունուար 2018 — Ընտրութիւններու երկրորդ փուլին համար, թեկնածուեր Նիկոս Անաստասիատիս եւ Ստավրոս Մալաս կը շարունակեն իրենց շփումներն ու խորհրդակցութիւնները։

Երէկ, Նիկոս Անաստասիատիս հեռաձայնային կապ հաստատեց ՏԻԿՕ-ի, ԷՏԷՔ-ի Ալիլենկիի-ի, ՔաղաքացիներուԴաշինքի եւ Բնապահպաններու Շարժումի նախագահներուն հետ։ Այս կէսօր, Նախագահական Պալատին մէջ, ան ընդունեց Եորղոս Լիլլիքասին եւ անմիջապէս ետք՝ Մարինոս Սիզոպուլոսին։

Երէկ, Ստավրոս Մալաս, հանդիպումներու շարք մը ունեցաւ ՏԻԿՕ-ի, Ալիլենկիի-ի եւ ԷՏԷՔ-ի նախագահներուն հետ։ Կ՛ակնկալուի, թէ պիտի ճշդուի նաեւ հանդիպում մը Բնապահպաններուն հետ։

Այս առաւօտ ժամը 9-ին, հանդիպեցան Նիկոլաս Պապատոպուլոսի թեկնածութեան զօրավիգ կանգնած կուսակցութիւններուն ղեկավարները։ ՏԻԿՕ-ի Գործադիր Վարչութեան երէկուայ նիստին, որոշուեցաւ որ կուսակցութիւնը պիտի չաջակցի ո՛չ Նիկոս Անաստասիատիսին, եւ ո՛չ ալ Ստավրոս Մալասին։ Որոշումը պիտի յղուի կուսակցութեան Կեդրոնական Կոմիտէին, որ նիստ պիտի գումարէ քիչ ետք, ժամը 6 ու կէսին։

ԷՏԷՔ-ը պիտի որոշէ Ուրբաթ օր, իսկ Ալիլենկիի՝ Ընդհանուր Խորհուրդի նիստին, որ կ՛ակնկալուի թէ տեղի պիտի ունենայ յառաջիկայ երկու օրերու ընթացքին։ Բնապահպաններու Շարժումը պիտի որոշէ վաղը, յետմիջօրէի 7-ին, համակիպրական համագումարի մը ընթացքին, իսկ Քաղաքացիներու Դաշինքը այսօր, կուսակցութեան Բարձրագոյն Մարմնի նիստի ընթացքին, որ սկիզբ պիտի առնէ յետմիջօրէի 6 ու կէսին։ ԷԼԱՄ կուսակցութիւնը յայտարարած էր, որ պիտի առնէ իր որոշումները, Նիկոս Անաստասիատիսին եւ Ստավրոս Մալասին յղած հարցարաններու պատասխանները ստանալէ ետք։ ՏԻԿՕ-ն ուղղութիւն պիտի չտայ իր քուէարկողմերուն, ընտրութիւններու երկրորդ փուլին համար, յայտնեց կուսակցութեան նախագահի տեղակալ Մարքոս Կիպրիանու, աւելցնելով որ անոնք կրնան քուէարկել, ապաւինելով իրենց խղճին։

Ելոյթ ունենալով Ռատիօկայանի Երրորդ Յայտագրէն, պարոն Կիպրիանու որակեց երկու թեկնածուներէն որեւէ մէկուն չաջակցելու առաջարկը իբրեւ քաղաքական կեցուածք, քանի որ կիպրական հարցի վերաբերեալ իրենց դիրքերը, Նիկոլաս Պապատոպուլոսի դիրքերէն 180 աստիճան հակառակ են։ Հերքելով ՏԻԿՕ-ի որոշ ղեկավարներու՝ կուսակցութեան ղեկավարութեան դէմ դրսեւորուող քննադատութիւնները, թէ ան փոխած է կիպրական հարցի շուրջ որդեգրած իր քաղաքականութիւնը, Մարքոս Կիպրիանու ըսաւ, թէ որեւէ փոփոխութիւն տեղի չէ ունեցած, ՏԻԿՕ-ի անժամանցելի դիրքերէն։ Ասոնք, պատճառաբանութիւններ են եւ պատռուակներ, ըսաւ ան, բոլոր անոնց համար, որոնք կը փափաքէին աջակցիլ Նիկոս Անաստասիատիսին։

Երէկ, Ստավրոս Մալասի մամլոյ բանբեր Իրինի Խարալամպիտու, Ստավրոս Մալասի շփումները կուսակցութիւններու ղեկավարութեան հետ, կառուցողական որակեց։ Այս հանդիպումներուն, յայտնեց տիկին Խարալամպպիտու, գոյութիւն ունէր գաղափարներու համամտութիւն, թէ անհրաժեշտ է վերստին կառուցել ընկերային-բարեխնամ պետութիւն մը։ Խարալամպիտու յայտնեց նաեւ, թէ քաղաքացիները եւ ընկերութիւնը քուէարկեցին, որ գոյութիւն ունենայ փոփոխութիւն մը, քանի որ նախագահ Անաստասիատիս ընտրութիւններու առաջին փուլին չապահովեց, ինչպէս ան խնդրած էր, ուժեղ հրահանգ մը ժողովուրդէն։

ՀԵՌՈՒՍՏԱՏԵՍԱԿԱՆ ԶՐՈՅՑ ԵՐԿՈՒ ԹԵԿՆԱԾՈՒՆԵՐՈՒՆ ՄԻՋԵՒ
Այս երեկոյ ժամը 8 ու կէսին, Ռատիօկայանի 3-րդ Սթուտիոյին մէջ տեղի պիտի ունենայ Հանրապետութեան նախագահութեան թեկնածու Նիկոս Անաստասիատիսի եւ Ստավրոս Մալասի միջեւ երկ-ժամեայ զրոյց, որ պիտի հեռասփռուի բոլոր կայաններուն կողմէ։

Զրոյցը պիտի կրէ ֆրանսական ձեւաչափը, որու հիման վրայ, երկու թեկնածուները պիտի կարենան զրուցել նաեւ իրար միջեւ, երկիրը յուզող էական հարցերու մասին։

Մէկ ժամ պիտի տրամադրուի կիպրական հարցին, արտաքին քաղաքականութեան եւ ուժանիւթին, եւ մէկ ժամ՝ ներքին կառավարման հարցերու։

Աւելցնել Ձեր մեկնաբանութիւնները