Նիկոսիա 12.02.2018 — Կիպրոսը հանրապետութեան Նախագահ Նիկոս Անաստասիատիս յայտնեց, թէ վերջին օրերուն, Կիպրոսի Տնտեսական Առանձնաշնորհեալ Գօտիէն ներս, Թուրքիոյ արձակած սպառնալիքներուն նկատմամբ, կառավարութիւնը պիտի դիմէ դիւանագիտական քայլերու, որպէսզի ի վերջոյ յարգուին Կիպրոսի Հանրապետութեան գերիշխանական իրաւունքները։

Ցաւով ականատես կ՛ըլլանք վերջին ժամերուն՝ Թուրքիոյ կատարած արարքներուն, յայտնեց Հանրապետութեան նախագահը, յայնտնելով նաեւ, թէ Թուրքիոյ կողմէ՝ արկածախնդրական արարքները, ոչ միայն չեն օգնէր վերահաստատելու վստահութիւնը, այլ նաեւ՝ օգտակար չեն հանդիսանար կիպրական հարցի խաղաղ լուծում մը գտնելու ջանքերուն։

Միւս կողմէ, նոյն հարցին շուրջ, պատասխանելով լրագրողի մը հարցումին, Հանրապետութեան նախագահը կրկնեց թէ քայլեր կ՛առնուին բոլոր ուղղութիւններով։ Անկէ անդին, չեմ ուզէր մանրամասնել, աւելցուց ան։

Ներկայ հանգրուանին առնուող քայլերը միշտ կը գտնուին այն ծիրէն ներս, որ մեր կողմէն, խուսափինք որեւէ քայլէ, որ կրնայ վատթարացնել կացութիւնը, առանց միաժամանակ անտեսելու այն բոլորը, որ Թուրքիա կը կատարէ, խախտելով միջազգային օրէնքները, եզրափակեց Հանրապետութեան նախագահը։

Աւելցնել Ձեր մեկնաբանութիւնները