Շաբաթ, 21 եւ կիրակի, 22 ապրիլին Հայաստանի մէջ եւ յատկապէս մայրաքաղաք Երեւանի մէջ ցուցարարները շարունակեցին բողոքի երթերն ու հաւաքները` ընդդէմ Սերժ Սարգսեանի վարչապետութեան:

Շաբաթ, 21 ապրիլին, ոստիկանութիւնը յայտարարութիւն մը տարածած է` պահանջելով Նիկոլ Փաշինեանէն եւ հաւաքի կազմակերպիչներէն  դադրեցնել Երեւան քաղաքի բոլոր մասերուն մէջ տեղի ունեցող անօրինական հաւաքները: Յայտարարութեան մէջ ըսուած է, թէ սահմանուած ողջմիտ ժամկէտին մէջ հաւաքը չդադրեցնելու պարագային ոստիկանութիւնը օրէնքով սահմանուած կարգով պիտի ցրուէ զայն:

Հաւաքը դադրեցնելու պահանջը Նիկոլ Փաշինեանին ներկայացուցած է ոստիկանութեան ներկայացուցիչ Վալերի Օսիպեան:

Շաբաթ, 21 ապրիլին Հայաստանի Հանրապետութեան վարչապետ Սերժ Սարգսեան յայտարարութիւն կատարած է ներքաղաքական իրավիճակին վերաբերեալ, որուն մէջ ըսուած է. «Անցեալ շաբթուան ընթացքին  մայրաքաղաք Երեւանի մէջ տեղի ունեցած են շարք մը ցոյցեր եւ երթեր: Խաղաղ ցոյցեր եւ երթեր կազմակերպելու իրաւունք ունի մեր երկրի իւրաքանչիւր քաղաքացի: Իշխանութիւնները յարգած են այդ իրաւունքը եւ պիտի շարունակեն միշտ յարգել:

«Ցաւալիօրէն, հանրային այդ հաւաքները յաճախակիօրէն հատած են օրէնքով թոյլատրուածի սահմանները եւ ստացած են անհարկի  դրսեւորումներ, որոնց մասին մանրամասն կը խօսուի ոստիկանութեան բազմաթիւ յայտարարութիւններու մէջ: Տեղի ունեցող զարգացումները յղի են անկանխատեսելի հետեւանքներով, կը վտանգեն հանրային կարգ ու կանոնը եւ կը վնասեն Հայաստանի հասարակութեան բարդ եւ նուրբ ներդաշնակութիւնը:

«Մեզմէ իւրաքանչիւրը պարտաւոր է յիշել, որ իրմէ բացի այս երկրին մէջ  կ՛ապրին, կը սորվին եւ կ՛աշխատին իրմէ ոչ պակաս հպարտ Հայաստանի քաղաքացիներ: Մեր հասարակութեան ներդաշնակութիւնը պէտք է հիմնուի համերաշխութեան եւ հանդուրժողականութեան վրայ:

«Խորապէս մտահոգուած եմ ծաւալող ներքաղաքական զարգացումներով: Անդառնալի կորուստներէ խուսափելու նպատակով` կոչ կ՛ուղղեմ Ազգային ժողովի պատգամաւոր Նիկոլ Փաշինեանին նստելու քաղաքական երկխօսութեան եւ բանակցութիւններու սեղանի շուրջ: Ատիկա պէտք է ընել անյապաղ:

«Վստահ եմ, որ իրավիճակին համարժէք նման երկխօսութիւն ձեւաւորելուն կրնան նպաստել երկրի բոլոր քաղաքական ուժերը», ըսած է վարչապետը:

Ազգային ժողովի «Ելք» խմբակցութեան ղեկավար Նիկոլ Փաշինեան անդրադարձած է վարչապետ Սերժ Սարգսեանի` անյապաղ երկխօսութիւն սկսելու կոչին եւ կրկնած հանրահաւաքի ընթացքին  ներկայացուցած իր նախապայմանները: «Արմէնփրես»-ի փոխանցումով` Նիկոլ Փաշինեան նշած է, որ երկխօսութեան պարագային պատրաստ են քննարկելու միայն Սերժ Սարգսեանի` իշխանութենէն հեռացման պայմանները:

«Մենք վրէժխնդրութիւններ չենք ուզեր: Հայաստանի մէջ  ներհայաստանեան թշնամանքի էջը փակուած է, հանրութեան մէջ  թշնամանք պէտք չէ յարուցենք: Սերժ Սարգսեանին կոչ կ՛ուղղեմ  ընդունելու մեր պայմանները», ըսած է Փաշինեան:

Միաժամանակ, ընդդիմադիր պատգամաւորը կարծիք յայտնած է, որ Հայաստանի մէջ Մարտի 1-ը չի կրնար կրկնուիլ: «Չեմ կարծեր, որ կայ  ոստիկան մը, որ պատրաստ է մեր վրայ կրակելու, հայ ազգի ոեւէ  ներկայացուցիչի կրակոցը պէտք է ուղղուած ըլլայ շփման գիծէն այն կողմ», ըսած է Փաշինեան:

Նշենք, որ շաբաթ օրուան ցոյցերը, որ սկիզբ առած էին Երեւանի Նոր Նորք վարչական շրջանէն, անցնելով Աւան, Քանաքեռ-Զէյթուն, Արաբկիր եւ Կեդրոն վարչական շրջաններով, երեկոյեան ժամը 7:00-ին հանրահաւաքի վայր` Հանրապետութեան հրապարակ հասան:

Նիկոլ Փաշինեան լրագրողներու հետ զրոյցի մը ընթացքին անդրադառնալով երկխօսութեան վերաբերեալ պետութեան առաջին դէմքերու կոչերուն, ըսած է, որ ան պատրաստ է արձագանգելու Հայաստանի Հանրապետութեան նախագահ Արմէն Սարգսեանի կոչին: «Ժամը 19:00-ին ես Արմէն Սարգսեանը կը սպասեմ Ազատութեան հրապարակին վրայ», ըսած է Փաշինեան:

Շաբաթ երեկոյեան ժամը 7:00-ին Հայաստանի Հանրապետութեան  նախագահ Արմէն Սարգսեան  Հանրապետութեան հրապարակ գտնուած եւ զրոյց մը ունեցած է Նիկոլ Փաշինեանին հետ:

Նախագահը, պատասխանելով լրագրողներու հարցումին, թէ արդեօք բանակցութիւններ պիտի ըլլա՞ն, պատասխանած. «Յոյսով եմ»:

Երեկոյեան տեղի ունեցած հանրահաւաքին ընթացքին Նիկոլ Փաշինեան ժողովուրդին ներկայացուցած է նախագահ Արմէն Սարգսեանին հետ իր ունեցած զրոյցին արդիւնքը` ըսելով, որ իրենք պատրաստ են քննարկելու իշխանութեան խաղաղ եւ անցնցում փոխանցման պայմանները, եւ պատրաստ են բանակցելու միայն այդ առաջարկին շուրջ:

Փաշինեան առաջարկած է բանակցութիւն կազմակերպել որեւէ չէզոք վայրի մէջ, օրինակ` «Մարիոթ» պանդոկը: «Ես ըսած եմ, որ օրակարգային նիւթը կրնայ ըլլալ միայն իշխանութիւնը խաղաղ եւ անցնցում փոխանցելը ժողովուրդին, ուրիշ նիւթ չի կրնար ըլլալ»: Փաշինեանը խնդրած է ժողովուրդէն, որ վերջինս լիազօրէ իրեն` մասնակցելու  բանակցութիւններուն, որուն ի պատասխան հաւաքուածները բարձրաձայնեցին` «այո՛, այո՛»:

Փաշինեանը անգամ մը եւս վերահաստատած է իրենց պահանջները.

  1. Սերժ Սարգսեանը հրաժարական տայ վարչապետի պաշտօնէն
  2. Ազգային ժողովը վարչապետ ընտրէ ժողովուրդի թեկնածուն
  3. Ձեւաւորուի ժամանակաւոր կառավարութիւն

Հանրահաւաքին ելոյթներ ունեցած են նաեւ Ազգային ժողովի «Ելք» խմբակցութեան պատգամաւորներ Արարատ Միրզոյեան եւ Սասուն Միքայէլեան:

ՀՅԴ Հանրային կապերու գրասենեակը հաղորդած է, թէ շաբաթ, 21 ապրիլին բանակցային հարթակ ձեւաւորելու նախաձեռնութեան շրջագիծին մէջ ՀՅԴ ներկայացուցիչները առանձնաբար հանդիպումներ ունեցած են «Ելք» խմբակցութեան պատգամաւոր Էտմոն Մարուքեանի, Հայաստանի Հանրապետութեան վարչապետ Սերժ Սարգսեանի եւ Հայաստանի Հանրապետութեան նախագահ Արմէն Սարգսեանի հետ:

Քննարկուած են ստեղծուած իրավիճակէն քաղաքական ելք գտնելու, բախումներէ զերծ մնալու, ժողովրդային շարժումը արդիւնաւորելու եւ երկխօսութեան ճամբով հանգուցալուծման հասնելու կարելիութիւնները:

Կիրակի, 22 ապրիլին, առաւօտեան ժամը 10:00-ին (Հայաստանի ժամանակացոյցով) Երեւանի «Արմենիա Մարիոթ» պանդոկին մէջ տեղի ունեցած է վարչապետ Սերժ Սարգսեանի եւ Ազգային ժողովի «Ելք» խմբակցութեան ղեկավար Նիկոլ Փաշինեանի հանդիպումը, որ կազմակերպուած էր լրագրողներու ներկայութեամբ:

Հանդիպումին Նիկոլ Փաշինեան նշած է, որ եկած է ոչ թէ երկխօսութեան, այլ քննարկելու` Սերժ Սարգսեանի հրաժարականի ու իշխանութեան խաղաղ, անցնցում փոխանցման պայմանները:

Սերժ Սարգսեան ի պատասխան ըսած է, որ ասիկա բանակցութիւն չէ,  այլ` շանթաժ.  «Դուք չէք գիտակցիր պատասխանատուութեան աստիճանը, դուք դասեր չէք քաղած  մարտի 1-էն, եւ եթէ այդ ոճով պէտք է խօսիք, ինծի կը մնայ խորհուրդ տալ, որ գաք օրինական դաշտ ու ընդհանրապէս տրամաբանական գործողութիւններու սահման, հակառակ պարագային ամբողջ պատասխանատուութիւնը ձեր վրայ է»:

Փաշինեան ըսած է, թէ ոեւէ մէկը չէ համարձակած ու չի կրնար համարձակիլ խօսիլ սպառնալիքներու լեզուով: «Դուք չէք պատկերացներ հանրապետութեան մէջ գոյութիւն ունեցող իրավիճակը: Անիկա 15-20 օր առաջուանը չէ: Հայաստանի մէջ իշխանութիւնը անցած է ժողովուրդի ձեռքը»:

«7-8 առ հարիւր հաւաքած կուսակցութիւնը իրաւունք չունի խօսելու ժողովուրդին անունով», պատասխանած է վարչապետը ու հեռացած:

«Ան պէտք է անյապաղ, այսօր հրաժարական տայ», լրագրողներու հետ զրոյցին նշած է Նիկոլ Փաշինեան: Վերջինս ժողովուրդին կոչ ուղղած է կրկնակի թափով շարունակել անհնազանդութեան գործողութիւնները եւ երեկոյեան ժամը 19:00-ին (կիրակի, 22 ապրիլ) կրկին հանրահաւաքի հրաւիրեց:

Ոստիկանութիւնը Յայտարարած Է, Թէ Իրաւասու Է Իրականացնել Բերման Ենթարկելու,
Ինչպէս Նաեւ Ուժ Գործադրելու Գործողութիւններ

Կիրակի, 22 ապրիլին Հայաստանի ոստիկանութիւնը յայտարարած է, որ տրուած է հաւաքները դադրեցնելու մասին որոշում, այդ կարգին` Հանրապետութեան հրապարակին վրայ, որուն պարագային հաւաքի մասնակիցները պարտաւոր են կատարելու «Հաւաքներու ազատութեան մասին» Հայաստանի Հանրապետութեան օրէնքի 30-րդ յօդուածով նախատեսուած իրենց պարտականութիւնները, մասնաւորապէս` ձեռնպահ մնալ այնպիսի գործողութիւններէ, որոնք նպատակաուղղուած են հաւաքի բնականոն ընթացքը խոչընդոտելուն, հաւաքէն հեռացուելու պարագային անյապաղ հեռանալ հաւաքի վայրէն, հաւաքը դադրեցուելու պարագային անյապաղ հեռանալ հաւաքի վայրէն:

Ազգային Ժողովի Երեք Պատգամաւորներ
Ձերբակալուած Են

Երէկ, օրուան ընթացքին տարբեր վայրերու մէջ գտնուող 3 պատգամաւորներ` Նիկոլ Փաշինեան, Արարատ Միրզոյեան եւ Սասուն Միքայէլեան, բերման ենթարկուած են: Քիչ անց Հայաստանի Հանրապետութեան Քննչական ծառայութիւնը հաղորդած է, թէ «Քննչական ծառայութեան քննիչին կողմէ  քննուող քրէական գործի շրջագիծին մէջ յանցագործութեան կատարումը կանխելու նպատակով, օրէնքով սահմանուած կարգի խախտումով հաւաք դիտաւորութեամբ կազմակերպելու եւ անմիջականօրէն ծագած կասկածանքով, Հայաստանի Հանրապետութեան սահմանադրութեան 96-րդ յօդուածի 2-րդ մասի պահանջներուն պահպանումով, ձերբակալուած են Հայաստանի Հանրապետութեան Ազգային ժողովի պատգամաւորներ Նիկոլ Փաշինեանը, Արարատ Միրզոյեանը եւ Սասուն Միքայէլեանը:

Յիշեալ պատգամաւորները բռնուած են հանրօրէն վտանգաւոր այն արարքներու կատարման պահուն, որոնք դրսեւորուած են «Հաւաքներու ազատութեան մասին» Հայաստանի Հանրապետութեան օրէնքով սահմանուած կարգի խախտումով 13 ապրիլէն կազմակերպել հաւաքներ` անտեսելով լիազօր մարմինի` Երեւանի քաղաքապետարանի կողմէ սահմանուած սահմանափակումները: Իսկ 19-էն 22 ապրիլին Երեւան քաղաքի տարբեր վարչական շրջաններու մէջ կազմակերպել հաւաքներ, որոնց մասին օրէնքով սահմանուած կարգով չեն իրազեկած լիազօր մարմինը:

Անօրինական հաւաքներու, այդ կարգին` երթերու ընթացքին Նիկոլ Փաշինեանը, Արարատ Միրզոյեանը եւ Սասուն Միքայէլեանը, անոնց կողմէ հրահանգուող անձեր պարբերաբար եւ կոպտօրէն խախտած են «Հաւաքներու ազատութեան մասին» Հայաստանի Հանրապետութեան օրէնքի շարք մը դրոյթներ:

Հայաստանի Հանրապետութեան Ազգային ժողովի պատգամաւորներու ձերբակալման մասին Հայաստանի Հանրապետութեան սահմանադրութեամբ սահմանուած կարգով անյապաղ տեղեկացուած է Ազգային Ժողովի նախագահը:

Երեւանի Հանրահաւաքէն Տուժած Են 10 Քաղաքացիներ, Բերման Ենթարկուած` 192

22 ապրիլին` կէսօրէ ետք ժամը 2:00-ի դրութեամբ Երեւանի հիւանդանոցներուն մէջ բուժում կը ստանային հանրահաւաքներու ընթացքին  տուժած 10 քաղաքացիներ:

Ըստ անհրաժեշտութեան 7-ի առողջական վիճակը բժիշկները գնահատած են բաւարար, 3-ինը` միջին ծանրութեան:

Նոյն օրը, ժամը 3:00-ի դրութեամբ, Հայաստանի  ոստիկանութեան կողմէ բերման ենթարկուած է 192 քաղաքացի: Այս մասին կը տեղեկացնէ Հայաստանի  ոստիկանութեան տեղեկատուութեան եւ հասարակութեան հետ կապերու վարչութիւնը:

Եւրոպական Միութիւնը Երկխօսութեան Կոչ Ուղղած Է

Եւրոպական Միութեան պաշտօնական կայքը հաղորդած է, թէ Եւրոպական Միութեան արտաքին յարաբերութիւններու եւ անվտանգութեան քաղաքականութեան հարցերով բարձր ներկայացուցիչ եւ յանձնաժողովի փոխնախագահ Ֆետերիքա Մոկերինիի անունով` բանբերի յայտարարութեան մէջ անդրադարձ կատարուած է  Հայաստանի մէջ տեղի ունեցող իրադարձութիւններուն` ընդգծելով երկխօսութեան կարեւորութիւնը:

Յայտարարութեան համաձայն, խաղաղ ճամբով եւ օրէնքի համաձայն հաւաքներ իրականացնելու ազատութեան իրաւունքը համամարդկային եւ հիմնարար իրաւունքներէն է, եւ Եւրոպական Միութիւնը կ՛ակնկալէ, որ Հայաստանի իշխանութիւնները լիակատար յարգանք ցուցաբերեն այդ իրաւունքին նկատմամբ:

«Խիստ կարեւոր է, որ բոլոր ներգրաւուած կողմերը ցուցաբերեն զսպուածութիւն եւ գործեն պատասխանատու կերպով: Կարեւոր է համընդգրկուն երկխօսութիւնը, որուն կոչը ուղղած էր նախագահ Արմէն Սարգսեանը` ուղղուած ստեղծուած իրադրութեան անյապաղ եւ խաղաղ լուծման», նշուած է յայտարարութեան մէջ` ընդգծելով, որ  անհանգստացնող ու յուսահատեցնող է այն, որ 22 ապրիլին Հայաստանի Հանրապետութեան վարչապետ Սերժ Սարգսեանի եւ պատգամաւոր Նիկոլ Փաշինեանի կարճատեւ հանդիպումը չկրցաւ կանխել դէպքերու  հետագայ մագլցումը:

Դարձեալ Հանրահաւաք` Հանրապետութեան Հրապարակին Վրայ

Երէկ` կիրակի, 22 ապրիլին, երեկոյեան ժամը 7:00-ին, Երեւանի Հանրապետութեան հրապարակին վրայ սկսած է  բազմահազարանոց հանրահաւաքը:

Հանրահաւաքին բացումը կատարած է Ազգային ժողովի «Ելք»  խմբակցութեան պատգամաւոր, «Քաղաքացիական պայմանագիր»  կուսակցութեան անդամ Լենա Նազարեան, որ հրապարակը հաւաքուած ցուցարարներուն կոչ ուղղած գիշերը չմնալ փողոցը` անվտանգութեան նկատառումներէ մեկնելով:

Ուսանողական շարժումի գործիչներէն Դաւիթ Պետրոսեան ուսանողներուն յայտնած է, որ այսօր, առաւօտեան ժամը 9:00-ին, կը սկսի ուսանողական դասադուլը:

Նշենք, որ հանրահաւաքին կազմակերպիչները Զարուհի Փոստանջեանին թոյլ չտուին ելոյթ ունենալ:

Երէկ երեկոյեան ուշ ժամերուն, «Արմէնփրես» հաղորդած է, թէ երկրէն դուրս գտնուղ Ազգային ժողովի նախագահ Արա Բաբլոյեանը «Զուարթնոց» օդակայանէն յայտարարած է, թէ պիտի ուղղուի ձերբակալուած 3 պատգամաւորներուն հետ հանդիպում ունենալու եւ անոնց մղելու, որ կատարուի իսկական երկխօսութիւն:

Արցախի Նախագահը Զսպուածութեան Կոչ Ուղղած Է

Նշենք, որ հայաստանեան իրադարձութիւններուն առիթով Արցախի Հանրապետութեան նախագահ Բակօ Սահակեան տարածած է յայտարարութիւն մը, որուն մէջ զսպուածութեան եւ հարցերը երկխօսութեամբ լուծելու կոչ ուղղած է:

Աւելցնել Ձեր մեկնաբանութիւնները