Հայաստանի Հանրային պատկերասփիւռի կայանի «Օրակարգից դուրս» հաղորդաշարը ՀՅԴ Բիւրոյի ներկայացուցիչ Հրանդ Մարգարեանին հետ ունեցած է հարցազրոյց մը, որուն ընթացքին ան անդրադարձած է Հայաստանի մէջ տեղի ունեցող ցոյցերուն` ընդդէմ Սերժ Սարգսեանի վարչապետ ընտրութեան:

ՀՅԴ Բիւրոյի ներկայացուցիչը, անդրադառնալով ժողովրդային շարժումին, ըսած է. «Ժողովուրդին մէկ մասը փողոց ելած է եւ ատիկա վկայութիւնն է այն բանի, որ երկրին մէջ առկայ են դժգոհութիւններ: Մենք գիտենք, որ դժգոհութիւններ կան: Այդ դժգոհութիւնները վերացնելու առումով, մենք արդէն նախաձեռնութիւններ ունէինք, նոյնիսկ անոր հետ կապուած դիմած էինք համագործակցութեան` Հանրապետական կուսակցութեան հետ եւ ստորագրած համապատասխան համաձայնագիր, միասին աշխատելու, այդ պատճառները վերացնելու համար: Ասիկա առաջին փաստն է, որ կ՛արձանագրուի:

Երկրորդ փաստը այն է, որ մեր ճիգն ու ջանքը բաւարար արդիւնք չէին տուած, դանդաղ էր ընթացքը եւ ատիկա պատճառ դարձաւ, որ ժողովուրդը առիթը  օգտագործէ ընտրութիւններու հարցով եւ դուրս գայ փողոց: Մինչեւ այստեղ դրական է: Այն, որ փողոցին մէջ չկան բախումներ, տհաճ երեւոյթներ, ժողովուրդը իր պարզ բողոքն ու դժգոհութիւն կ՛արտայայտէ, դրական է: Հարցը այն է, որ մենք կարենանք այս բոլորէն դրական եզրայանգումներ կատարել: Շատ անգամներ ատիկա տեսած ենք Հայաստանի մէջ. Ստեփան Դեմիրճեանը, Րաֆֆի Յովհաննիսեանը, Սասնայ ծռերը® Ամէն անգամ Դաշնակցութիւնը հրապարակ իջած է միջնորդութիւններով, որ կարենայ ստեղծուած վիճակը օգտագործել երկրին մէջ հիմնական հարցեր լուծելու համար: Յաճախ ուժերը առաջնորդուած են ամէն ինչ կամ ոչինչ սկզբունքով եւ անոնց ոչ մէկ կողմը անկէ շահած է: Այս անգամ, յոյս ունիմ, որ Դաշնակցութեան երկխօսութեան, բանավէճի նախաձեռնութիւնը, հարթակ ստեղծելու` արդիւնք կ’ունենայ, որուն մասին նշուած է նաեւ մեր յայտարարութեան մէջ: Փաստ է, որ մենք կրնանք այսօր, այս ստեղծուած իրավիճակին մէջ ամէնէն ճիշդ արդիւնքը քաղել:

Արդէն հրապարակուած է մեր յայտարարութիւնը, մենք սկսած ենք խօսիլ բոլոր ուժերուն հետ, որպէսզի բոլորին համոզենք, որ այդ հարթակին շուրջ, ուր  համախորհուրդ պէտք է որոշում կայացուի, պէտք է բոլոր հարցերը քննութեան նիւթ դառնան: Յոյս ունիմ, որ մենք կը յաջողինք եւ այս վիճակը, որ ստեղծուած է դուրսը, անկէ կարենանք առաւելագոյն օգուտ քաղել: Հարցը այն է, որ մեր երկիրը շատ նուրբ իրավիճակի մէջ է, արտաքին սպառնալիքը իրական սպառնալիք է եւ ամէն վայրկեան կրնայ վերածուիլ իրական վտանգի: Մեր երկիրը դիւրաբեկ է, այդ պատճառով ալ բոլորս պէտք է շատ զգուշ ըլլանք: Պէտք է հասկնանք, որ մեր երկիրը, մեր ժողովուրդը մեղք են: Պէտք չէ թոյլ տանք, որ այս ամէնը սխալ ուղղութեամբ ընթանայ, երկիրն ու ժողովրդին տանի տկարացման: Ընդհակառակն, այս ամէնը պէտք է տանինք մէկ ուղիով, որմէ  երկիրն ու ժողովուրդը հզօրացած, ուժեղացած դուրս կու գան: Այս է մեր առաջարկը: Դժգոհութեան պատճառները պէտք է վերացուին, պէտք է հիմնական փոփոխութիւններ կատարուին:

Աւելցնել Ձեր մեկնաբանութիւնները