Ազգային ժողովի նախագահ Արա Բաբլոյեան 26 ապրիլին տեղեկացուցած է, որ վարչապետի ընտրութեան հարցով խորհրդարանի յատուկ նիստը տեղի պիտի ունենայ յաջորդ երեքշաբթի, 1 մայիսին:

«Ազգային ժողովի կանոնակարգ» օրէնքի համաձայն, վարչապետի թեկնածու առաջադրելու իրաւունք ունին բոլոր խմբակցութիւնները, կրնան նաեւ քաղաքական դաշինք կազմել այլ խմբակցութեան հետ եւ առաջադրել վարչապետի մէկ թեկնածու: Խորհրդարանական բոլոր խմբակցութիւնները կը պնդեն, որ տակաւին թեկնածու չեն առաջադրած:

ՀՅԴ Հայաստանի Գերագոյն մարմինի ներկայացուցիչ Արսէն Համբարձումեանի համաձայն, որեւէ տարբերակ չեն բացառեր` ինչպէս Նիկոլ Փաշինեանի թեկնածութիւնը պաշտպանելը, այնպէս ալ սեփական թեկնածուով հանդէս գալը: Առաջադրման պարագային, Համբարձումեանի խօսքով, կանխակալ մօտեցում պիտի չունենայ նաեւ ՀՀԿ-ի թեկնածուի հարցով: «Խնդիրը ընդհանուր քաղաքական յայտարարի գալն է», ըսած է Համբարձումեան:

Դաշնակցութիւնը շարք մը հարցեր ունի ճշդելիք Փաշինեանի հետ: Պատրաստ պիտի չըլլան անոր ձայն տալ, եթէ իրենց բարձրացուցած հարցերուն վերաբերեալ Փաշինեանը ունենայ այլ մօտեցումներ:

«Մեզի համար շատ կարեւոր է, որ վարչապետի թեկնածուն խորհրդարանին կողմէ առաջադրուի համախոհութեամբ: Կը կարծեմ, որ քաղաքական խորհրդակցութիւնները պիտի ըլլան այս ուղղութեամբ: Եթէ յաջողութիւն չարձանագրուի, այդ պարագային չի բացառուիր, որ 1 մայիսին տեղի ունենալիք նիստին ժամանակ առաջադրուին քանի մը  թեկնածուներ: Իսկ արդէն այդ պարագային չի բացառուիր, որ առաջադրուած թեկնածուներէն ոեւէ մէկը, նկատի ունենալով նաեւ ուժերու յարաբերակցութիւնը եւ ստեղծուած իրավիճակը, բաւարար թիւով ձայներ չհաւաքէ: Եւ այդ պարագային կ՛երթանք երկրորդ փուլի  վարչապետի ընտրութեան, որ նոյնպէս դժուար է կանխատեսել, թէ ի՞նչ զարգացում կրնայ ունենալ: Այսինքն` այդքան ալ միանշանակ չէ, որ մայիս 1-ին կամ 2-ին, եթէ քաղաքական համաձայնութիւն չձեւաւորուի, մենք հանգուցալուծում կրնանք ունենալ»:

Համբարձումեան ծանօթ է շրջանառուող տեսակէտներուն, թէ իրենք նաեւ նախարարական աթոռներ կը փորձեն կարգաւորել, եւ վստահեցուց, թէ իրենց համար «ամենեւին կարեւոր չէ իշխանութեան մէջ ըլլալ-չըլլալու հարցը». «Մեզի համար կարեւոր է, որ մեր տեսակէտներուն, մեր մօտեցումներուն հետ օրուան իշխանութիւնները հաշուի նստին»:

Ներկայացնելով համաձայնական դաշինքէն Դաշնակցութեան դուրս գալու դրդապատճառները` Համբարձումեան ըսաւ. «Հայաստանի մէջ  իրականութեան մէջ ստեղծուած է արտակարգ իրավիճակ, եւ այս իրավիճակէն դուրս գալու ելքեր փնտռելու հարցով պատասխանատու են բոլոր դերակատար քաղաքական ուժերը: Եւ մեր պատկերացումով, դաշինքէն դուրս գալու քայլը կրնայ նպաստել մեր գործողութիւններու  ազատութեան տեսանկիւնէն, եւ կը կարծեմ, այն առաքելութիւնը, որ մեք  ստանձնած ենք` բանակցային հարթակ ձեւաւորելու, կրնանք այս կարգավիճակով աւելի արդիւնաւէտ իրականացնել, որպէսզի կարենանք ճիշդ ելքեր գտնել իրավիճակը հանգուցալուծելու համար»:

Աւելցնել Ձեր մեկնաբանութիւնները