«Ազատութիւն» ձայնասփիւռի կայանին հետ ունեցած զրոյցին ընթացքին ՀՅԴ Հայաստանի Գերագոյն մարմինի ներկայացուցիչ Աղուան Վարդանեան յայտարարեց, որ ՀՅԴ-Հայաստանի Հանրապետական կուսակցութիւն համագործակցութիւնը մէկ տարուան համագործակցութիւն չէ, այլ ուղղուած է դէպի ապագայ:

Ան անլուրջ նկատեց այն բոլոր հրապարակումները, որոնք կան մամուլին մէջ եւ շրջան կ՛ընեն լրատուամիջոցներուն կողմէ: «Կայ համագործակցութեան առաջարկ, կան աշխատանքային քննարկումներ,  քննարկուող խնդիրները այնքան բազմազան են եւ առանցքային, որ միայն պաշտօններու վրայ կեդրոնանալը լուրջ չէ: Մենք հսկայական աշխատանք կը կատարենք, եւ ասիկա դաւադրական երեւոյթ չէ, մեր երկրին մէջ որակական փոփոխութիւններու հասնելու մեր պատկերացումները կը ներկայացնենք եւ կը փորձենք գալ համաձայնութեան: Երբ երկու ուժեր կը բանակցին, բնականաբար, կը քննարկեն, տեսակէտներու բախում, բանավէճ կ՛ըլլայ, կը փորձենք լուծումներ գտնել: Մեր հիմնական խնդիրն է` գտնել այն ուղղութիւնները, որ կարենանք միացեալ ուժերով դրական ակնկալիք, յոյս յառաջացնել մեր քաղաքացիներուն մօտ: Երկրորդ խնդիրը` համագործակցութեան ձեւաչափն է. երկու ուժեր պէտք է միասնաբար աշխատին` ի՞նչ  ձեւաչափով պիտի աշխատին, ինչպէ՞ս պիտի քննարկեն հարցերը, ինչպէ՞ս որոշումներ պիտի տան, խորհրդատուական մարմին անհրաժե՞շտ է, թէ՞ ոչ, ասոնք եւս կարեւոր հարցեր են, որ վաղը, միւս օրը խնդիրներ չյառաջանան: Եւ միայն երրորդ խնդիրն է` համապատասխան մարզերու ընտրութեան հարցը», յայտարարեց Վարդանեան: Ան տեղեկացուց, որ կրթութեան եւ գիտութեան, տարածքային կառավարման եւ տնտեսութեան նախարարի պաշտօնները Դաշնակցութեան փոխանցելու հարցը քննարկման հանգրուանին մէջ է:

ՀՅԴ Հայաստանի Գերագոյն մարմինի ներկայացուցիչը վստահեցուց, որ քանի մը օրէն ամէն ինչ աւելի յստակ կ՛ըլլայ: Ըստ անոր, ամէն շաբաթ կը գումարուին ՀՅԴ Հայաստանի Գերագոյն մարմինի նիստերը, կը կատարուին միացեալ քննարկումներ ՀՅԴ Բիւրոյին հետ, իսկ այս հանգրուանին համագործակցութեան շուրջ  բանակցութիւնները հիմնականին մէջ կը կայանան Հայաստանի եւ Հանրապետական կուսակցութեան նախագահ Սերժ Սարգսեանի եւ ՀՅԴ Բիւրոյի ներկայացուցիչ Հրանդ Մարգարեանի միջեւ:

Պատասխանելով լրագրողի մը այն հարցումին, թէ 2017-էն ետք համագործակցութիւնը պիտի շարունակուի` Վարդանեան նախ նշեց, որ բնականաբար այսօր այդ հարցումին պատասխանելը շատ թէական կ՛ըլլայ. ան շեշտեց, որ ներկայիս կարեւորը իսկապէս լրջօրէն ընտրութիւններուն պատրաստուիլն է, վստահութիւն ներշնչող Ընտրական օրէնսգիրք ունենալն է, որ չ՛արտօներ արհեստական կամ այլ ձեւերով որեւէ քաղաքական ուժի առաւելութիւն ունենալը:

«Ես յոյս ունիմ, որ մենք առաջին անգամ ըլլալով լաւագոյն ընտրութիւնները կ՛ունենանք, քննարկումները այդ հունով կ՛ընթանան, բնականաբար, մեր համագործակցութիւնը միտուած է ապագային, մէկ տարուան  համագործակցութիւն չէ», ըսաւ Վարդանեան:

Լրագրող մը հարցուց, թէ Դաշնակցութիւնը ի՞նչ պիտի փոխէ կառավարութեան մէջ. Վարդանեան պատասխանեց, որ ներկայիս հարցերը այնքան մեծաթիւ են եւ զանոնք համախմբուած դիմագրաւելու կարողութիւնը այնքան ցաքուցրիւ, որ Դաշնակցութեան ներկայութեամբ նոր որակ պիտի հաղորդուի կառավարման արդիւնաւէտութեան. նոր սահմանադրութեամբ Դաշնակցութիւնը սկիզբ դրած է միանձնեայ կառավարման վերջ տալու հոլովոյթին:

«Սահմանադրական փոփոխութիւնները կատարած ենք այդ նպատակով, որ երկրին մէջ իրավիճակ փոխուի, իսկ որպէսզի երկրին մէջ իրավիճակ փոխուի, ՀՅԴ-ի մասնակցութիւնը, պատասխանատուութիւնը, աշխատանքը անհրաժեշտ են: Կայ աշխատելու դաշտ, նման բարդ պայմաններու մէջ նման պատասխանատուութիւններ ստանձնել, վստահաբար բարդ է, բայց ասիկա Դաշնակցութիւնն է: Մեզի համար էականը երկրին մէջ դրական փոփոխութիւններու հասնիլն է եւ ես յոյսով եմ, որ մենք կը հասնինք անոր», եզրափակեց Աղուան Վարդանեան:

 

Շարմազանով. «ՀՅԴ-ի Հետ Կայ Նախնական Համաձայնութիւն»

Հայաստանի Հանրապետական կուսակցութեան Գերագոյն մարմինի նիստէն ետք լրագրողներուն հետ ունեցած զրոյցին ընթացքին կուսակցութեան բանբեր, Ազգային ժողովի փոխնախագահ Էդուարդ Շարմազանով յայտարարած է, թէ նիստին ընթացքին հիմնականին մէջ անդրադարձ կատարուած է ՀՀԿ-ՀՅԴ  համագործակցութեան ձեւաչափին, սակայն, Դաշնակցութեան յանձնուելիք նախարարութիւններուն մասին տեղեկութիւն պիտի տրուի շաբաթավերջին:

«ՀՅԴ-ի հետ Հանրապետական կուսակցութիւնը ունի ընդհանուր առմամբ նախնական համաձայնութիւն` ապագային կառավարման համակարգին մէջ միասնաբար աշխատելու: Վերջնական համաձայնութեան մասին կը խօսինք շաբաթավերջին: Փաստեմ, որ ՀՅԴ-ի հետ Հանրապետական կուսակցութիւնը շատ հաւանական կը նկատէ համաձայնութիւնը, եւ այսօր ունինք ՀՅԴ-ի հետ նախնական համաձայնութիւն», ըսած է ան:

Շարմազանովի համաձայն, կայ նախնական համաձայնութիւն, իսկ նախնականը անպայման վերջնական չէ. «Նախնական համաձայնութիւնը 100 տոկոսը չէ, այլ 95, բայց  հիմնական մասով»:

Շարմազանով նշած է, որ թէեւ անուններ պիտի չհրապարակէ, բայց  պաշտօններու հարցերը հիմնականօրէն լուծուած է, ինչպէս նախարարներու, այնպէս ալ մարզպետներու պարագային. «Մամուլին մէջ հրապարակուած նիւթերուն մէկ մասը կը համապատասխանէ, միւս մասը չի համապատասխաներ իրականութեան: Մեր համաձայնութիւնը ոչ թէ զուտ պաշտօններու մեքենական յանձնումի հարցն է, այլ լուրջ ծրագիրի դրութիւններու վրայ պէտք է ըլլայ»:

Ան աւելցուցած է, թէ իրենց կուսակցական գործընկերները պիտի շարունակեն իրենց գործունէութիւնը այլ մարզերու մէջ` առանց անդրադառնալու այդ մարզերուն:

Աւելցնել Ձեր մեկնաբանութիւնները