ՀՅԴ Բիւրոյի քաղաքական ներկայացուցիչ, Ազգային ժողովի ՀՅԴ խմբակցութեան ղեկավար Արմէն Ռուստամեան չի կարծեր, թէ Արծուիկ Մինասեանի հրաժարականի անհրաժեշտութիւն կայ: Խորհրդարանին մէջ լրագրողներուն հետ զրոյցի մը ընթացքին ան նշեց. «Մանէ Թանդիլեանի պարագան քիչ մը այլ էր, որովհետեւ ան այդ ոլորտի ղեկավարն էր եւ ներկայացուցած էր նախագիծ մը, որ մերժուած էր»:

Ռուստամեան ընդգծեց, որ այս իրավիճակին մէջ պէտք է հետեւողական ըլլալ, եւ պէտք է լուծուի պարտադիր բաղադրիչին վերաբերող հարցը: Պատգամաւորը ըսաւ, որ կառավարութեան մէջ քննարկուող հարցը ոչ թէ կը վերաբերէր պարտադիր բաղադրիչի վերացման, այլ ուղղուած էր հարցին վերաբերեալ մեղմացման ուղիներ գտնելու:

«Վարչապետն ալ արձանագրած է, որ սահմանադրականութիւնը պահպանելու հարց կայ, արդարութիւնը վերականգնելու հարց կայ: Կը կարծեմ, թէ մենք հիմա կ՛ընթանանք այն ուղղութեամբ, ուր նպատակ կը դնենք այս հարցը արդար եւ սահմանադրական չափանիշներով լուծել: Ասիկա իբրեւ միջանկեալ քայլ կը կատարուի, եւ 1 յուլիսին վիճակը կրնայ թեթեւցնել», նշեց ան:

Արմէն Ռուստամեան ընդգծեց, որ քննարկումի ընթացքին ձեռք բերուած է պայմանաւորուածութիւն, որ այս հարցը օրակարգի վրայ կը մնայ. «Մենք պէտք է հասնինք հոն, որ պարտադիր բաղադրիչը հանուի: Ատիկա է խնդիրը», ըսաւ ան:

Հարցումին` այդ պարագային ինչո՞ւ ՀՅԴ-ն չպաշտպանեց Թանդիլեանի մօտեցումը, որ մէկ տարիով պէտք է յետաձգել օրէնքի ընդունումը, Ռուստամեան պատասխանեց. «Մենք պաշտպանած ենք այդ նախագիծը, բայց ատիկա չքննարկուեցաւ: Մենք չենք օրակարգը ձեւաւորողը, կառավարութեան գործունէութեան կարգ կայ»:

Աւելցնել Ձեր մեկնաբանութիւնները