Եռօրեայ այցելութեան մը շրջագիծին մէջ ՀՅԴ Բիւրոյի ներկայացուցիչ Հրանդ Մարգարեան հարցազրոյց մը տուած է «Ալիք» օրաթերթին, պատասխանելով յատկապէս Արցախի տագնապին վերաբերող հարցումներուն: Հարցազրոյցը` ստորեւ:

«Արցախի հիմնահարցը եւ նրա հզօրացումը միշտ էլ եղել է Դաշնակցութեան առաջնային օրակարգում: Եւ ի զուր չէ, որ իւրաքանչիւր մանրամասնութեան Դաշնակցութիւնը խստագոյնս է արձագանգում եւ հետեւողականօրէն հարցերին վերաբերւում: Ելնելով այս սկզբունքից օրաթերթս հէնց Արցախեան վերջին իրադարձութիւնների շուրջ զարգացումների մասին խօսեց Բիւրոյի ներկայացուցչի հետ:

Թէ այսօր որքանով է հարցը հրատապ ու վտանգաւոր, տարածուող հրապարակումներից արդէն կարելի է ենթադրել, իսկ հարցին աւելի իրական մօտեցում ցուցաբերելու եւ առանց որեւէ դոյզն իսկ կասկած դրսեւորելու, թէ այսօր առաջնագծում տիրող իրավիճակը ուղղակի օգտագործւում է ներքին հարցերից ուշադրութիւն շեղելու իմաստով, Հրանդ Մարգարեանը պատասխանեց այս կերպ. «Ես գիտեմ, որ հիմա այն ինչ որ պէտք է ասեմ, որոշ ուժեր պէտք է փորձեն հեգնել, թէ ամէն անգամ, որ ներքին իրավիճակը անկայունանում է, ներքին օրակարգեր են առաջ գալիս, մենք փորձում ենք ուշադրութիւնը շեղել, իրենց կարծիքով` դէպի Արցախ: Բայց հարցը նրանում է, որ Արցախը, դեռ շարունակում է մնալ մեր գլխաւոր հարցը, մեր գերխնդիրը: Եթէ մենք կորցնենք Արցախը կամ Արցախի հարցում ունենանք կորուստներ, դա նշանակում է, որ վերջին 28 տարիների մեր անկախութեան այս ճիգն ու ջանքը ի զուր է լինելու կամ գրեթէ ի զուր է լինելու»:

ՀՅԴ Բիւրոյի ներկայացուցիչը կարեւորութեամբ նաեւ յաւելեց, որ «հարցը նրանում է, որ սա մեր ամենամեծ ձեռքբերումն է եւ այս յաղթանակի վրայ պէտք է դողալ: Եւ ես դողալ բառը առանց վարանելու եմ շեշտում, եթէ նոյնիսկ դա որոշների հեգնանքի առարկայ կարող է դառնալ»:

Վերջին ամիսների կտրուածքով զարգացող իրողութիւններին անդրադառնալով` նա նշեց, որ «հարցը լուրջ է եւ սա բնական է, երբ Հայաստանում խնդիր կայ, մեր արտաքին քաղաքականութեան մէջ խնդիր կայ, Ազրպէյճանը աշխուժանում է, ստեղծուած առիթը օգտագործում իր ծրագրերը յաջողեցնելու համար: Դա մենք պէտք է թոյլ չտանք, պէտք է հասկանանք, որ այսօրուայ մեր գերագոյն խնդիրը Արցախն է, Արցախի անվտանգութեան ապահովումը, ինչը նշանակում է` մենք պէտք է կարողանանք զօրաշարժի ենթարկել մեր ողջ ներքին կարողականութիւնը` Հայաստանում, Արցախում եւ սփիւռքում, ինչպէս նաեւ յարաբերական աշխատանքների մէջ եւ բոլոր-բոլոր բնագաւառներում, որպէսզի Արցախի հարցում մենք նահանջ չարձանագրենք»:

Նախիջեւանեան վերջին դէպքերի մասին նա ասաց. «Մենք արդէն ունեցել ենք կորուստ, արդէն մենք Նախիջեւանի սահմանի վրայ կորուստ ենք ունեցել` ուղղակի չենք ցանկանում դա քաղաքական շահարկման թեմա դարձնել եւ ճիշդ ենք անում, որովհետեւ Հայաստանի մէջ կատարուածը այնքան կարեւոր էր, որ դա պէտք չէ մենք արժեզրկենք` մի ուրիշ հարց արծարծելով, տուեալ դէպքում սակայն, դա մի ուրիշ հարց չի` դա հայրենիք է, հայրենիքի անվտանգութիւն է, հայրենիքի մինչ այս ունեցած ձեռքբերումն է, ապահովումն է: Ինչպէս արդէն ասացի, այդ կորուստը լուրջ է եւ մենք պէտք չէ թողնենք, որ այդ ընթացքը շարունակուի»:

Նա նշեց, որ մենք պէտք է գօտեպնդուենք, պէտք է մեր ուժերը ի մի բերենք, հասկանանք, որ ներքին միասնականութիւնը, ներքին բարեփոխումները, փոփոխութիւնը Հայաստանում պէտք է ընթանայ այն ուղիով, որ մենք Արցախի ճակատում նահանջ չունենանք: Սա պէտք է լինի մեր հիմնահարցը: Փոփոխութիւններ` անկասկած անհրաժեշտ են, բայց այնպէս, որ չվնասենք Արցախի հիմնահարցին:

Անդրադառնալով Հայաստանի վարած արտաքին քաղաքականութեան հարթակում այս ուղղութեամբ տարուող աշխատանքներին Հրանդ Մարգարեանը շեշտեց, որ «արտաքին քաղաքականութեան մէջ էլ ես կարծում եմ բոլոր քաղաքական ուժերը անկախ այն բանից, թէ այսօր ընդդիմադիր են թէ ոչ, բոլոր ուժերն էլ իրենց աշխատանքը պէտք է տանեն, որպէսզի արտաքին քաղաքականութեան մէջ չունենանք թիւրիմացութիւններ, կասկածամտութիւններ չստեղծուեն մեր երկրի շուրջ եւ մենք կարողանանք ունենալ կայունութիւն: Կայունութիւն, որը իր ազդեցութիւնն է ունենալու Արցախի հարցի վրայ»:

Արցախը Պէտք Է Լինի Ներքնապէս Ամուր, Միասնական Եւ Վճռական

Ամփոփելով իր խօսքը, ՀՅԴ Բիւրոյի ներկայացուցիչը ընդգծեց. «Արցախից պէտք է ամուր ձայն լսուի, վճռական ձայն պէտք է լսուի, Արցախից ազգային միասնականութեան կոչ պէտք է հնչի, որովհետեւ սա է մեր հիմնական ներուժը, որի վրայ մենք կարող ենք յենուել եւ ոչ միայն ունեցած յաջողութիւնները ամրագրել եւ պահպանել, այլ նաեւ նոր ձեռքբերումներ ունենալ: Գլխաւոր մտահոգութիւնն այսօր` Արցախն է եւ այդ մտահոգութիւնը շինծու չէ, նոյնիսկ նրանք, որ այսօր հեգնում են, նրանք էլ ներքուստ համոզուած են, որ այդ մտահոգութիւնը իրական է»:

Աւելցնել Ձեր մեկնաբանութիւնները