Օգոստոս 21-ի կէսօրին, իր աւարտին հասաւ ՀՅԴ Կիպրոսի Երիտասարդական  Միութեան Պատանեկան 28-րդ Բանակումը, Թրոտոսի լեռներուն մէջ գտնուող՝ բանակավայրին մէջ։ 14-էն 21 Օգոստոս երկարող՝ պատանեկան բանակումին մասնակցեցան Նիկոսիայէն, Լառնագայէն, Լիմասոլէն ինչպէս նաեւ՝ Պաֆոսէն պատանիներ, որոնց միացաւ նաեւ բանակումի խմբապետական կազմը, մասնակիցներու ընդհանուր թիւը բարձրացնելով 70-ի։

Բանակողները անցուցին դաստիարակչական նիւթերով, պտոյտներով եւ արշաւներով լեցուն շաբաթ մը, անմոռանալի ընկերային մթնոլորտի մը մէջ։ Բանակումի աւարտին, տեղի ունեցաւ աւանդական ճաշկերոյթ-խրախճանք եւ Պատանեկան 28-րդ Բանակումի Փակման հանդիսութիւնը, ծնողներու եւ համակիրներու ներկայութեամբ, որու ընթացքին խօսք առին ՀՅԴաշնակցութեան Կիպրոսի Կոմիտէի ներկայացուցիչ ընկեր Սիմոն Այնէճեան, ինչպէս նաեւ հանդիսութեան նոր ժամանած՝ ՀՅԴ Երիտասարդական Եւրոպայի եւ Միջին Արեւելքի Շրջանային Բանակումի մասնակցող Հայաստանի եւ Արցախի երիտասարդական միութիւններու ընկերներ Մերուժան Սուլեյմանյան եւ Սամվէլ Մարդէյան:

Ինքնապաշտպանութեան մարզանքներու ներկայացումէն, պարերէն ու երգերէն ետք, ներկաները միասնաբար երգեցին “Մենք Անկեղծ Զինուոր Ենք”ը, որու յաջորդեց դրօշակի արարողութիւնը եւ պաշտօնական փակումը, “Մշակ Բանուոր” Քայլերգով:

Նոյն օրը, Բլաթրէսի՝ ՏԷՕՔ բանակավայրին մէջ, որ գտնուի Թրոտոսէն կարճ հեռաւորութեան վրայ, սկսաւ նաեւ ՀՅԴ Երիտասարդական Եւրոպայի եւ Միջին Արեւելքի Շրջանային Բանակումը, որ պիտի տեւէ մինչեւ 28 Օգոստոս։

Կիպրոսէն մասնակցող՝ ՀՅԴ ԿԵՄ-ի անդամներէն եւ համակիրներէն զատ, բանակումին կը մասնակցին Լիբանանէն, Սուրիայէն, Քուէյթէն, Անգլիայէն, Շուէտէն, Հոլանտայէն, Ֆրանսայէն, Ռուսիայէն, Իրանէն, Միացեալ Արաբական Էմիրութիւններէն, ինչպէս նաեւ՝ Հայաստանէն, Արցախէն եւ Ջաւախքէն ՀՅ Դաշնակցութեան Երիտասարդական Միութիւններու անդամներ։

Բանակումը կ’ընդգրկէ դաստիարակչական ճոխ յայտագիր, որ կը ներառէ դասախօսութիւններ, ինքնապաշտպանութեան մարզանքներ, արշաւներ եւ դաստիարակչական պտոյտներ, կղզիի զանազան շրջաններուն մէջ։

Աւելցնել Ձեր մեկնաբանութիւնները