27/10/2016 — www.artsakank.com.cy — Երէկ առտու, Նիկոսիոյ մէջ իր աշխատանքներուն սկսաւ ՀՄԸՄ-ի միջդիւանական 9-րդ խորհրդաժողովը` որուն իրենց մասնակցութիւնը կը բերեն միութեան համահայկական կառոյցի 7 Շրջանային եւ 12 Մեկուսի վարչութիւններու 40 ներկայացուցիչները, ՀՄԸՄ-ի Կեդրոնական վարչութեան կազմը եւ «Մարզիկ» պաշտօնաթերթի խմբագիրը:

Բացման խօսքով հանդէս եկաւ եւ համա-ՀՄԸՄ-ական նման խորհրդաժողովներու կարեւորութեան եւ դերակատարութեան մասին խօսեցաւ ՀՄԸՄ-ի Կեդրոնական վարչութեան ատենապետ Գառնիկ Մկրտիչեան: Ան նշեց, որ նման խորհրդաժողովները առիթներ են միութենական մեր ներուժը գնահատելու, անցնող ժամանակաշրջանի գործունէութիւնը արժեւորելու եւ աւելի փայլուն ապագայ մը ծրագրելու համար:

Ան ըսաւ, որ մեր ժողովուրդի եւ հայրենիքի պատմութեան նշանակալից այս օրերուն, ՀՄԸՄ կը մնայ «Մի՛շտ պատրաստ» սկզբունքով գործող այն կազմակերպութիւնը, որ իր բովանդակ կարողականութիւնը ի սպաս կը դնէ մեր ժողովուրդի կարիքներու բաւարարման եւ Հայաստանի հզօրացման ու բարգաւաճման: ՀՄԸՄ-ի Կեդրոնական վարչութեան ատենապետին խօսքէն ետք, խորհըրդաժողովը անցաւ իր առաջին օրուան աշխատանքին եւ լսեց շրջաններու ամփոփ տեղեկագիրները, որոնք այդ շրջաններու ներկայացուցիչներուն կողմէ ներկայացուեցան լսատեսողական արդի միջոցներով:

Խորհրդաժողովը իր աշխատանքները պիտի շարունակէ նաեւ վաղը, օրակարգի վրայ ունենալով մարզական, սկաուտական, վարչական գործունէութեան վերաբերող նիւթեր, ՀՄԸՄ-ի եւ Հայաստանի Ա. Հանրապետութեան 100-ամեակի տօնակատարութիւններուն վերաբերող ծրագիրներ, «Մարզիկ» պաշտօնաթերթի եւ ՀՄԸՄ-ի քարոզչական միջոցներուն առնչուող հարցեր եւ վարչական ու դիւանական ընթացիկ աշխատանքներ:

Աւելցնել Ձեր մեկնաբանութիւնները